Edhe një rast i dhunës ndaj një gruaje ka ndodhur në Prishtinë. Bëhet fjalë për një sulm verbal e fizik në mes të një prej rrugëve të kryeqytetit që ish- drejtori, Fatmir Sfishta ka bërë ndaj një gruaje, respektivisht zyrtares për Barazi Gjinore në Qendrën e Studentëve, G.V.
Dita e diel e 1 tetorit 2023 është kthyer në ankth për gruan G.V., për faktin se pa ndonjë arsye deri sa ishte duke ecur rrugës është ndalur dhe e ngacmuar me fjalë, fyer e sharë, mandej edhe është sulmuar fizikisht nga ish-kolegu i punës, respektivisht ish- drejtori i saj.
Për sulm po akuzohet Fatmir Sfishta, i cili ditë më parë nga Ministria e Arsimit, Shkencës, Teknologjisë dhe Inovacionit (MASHTI) u shkarkua nga detyra e drejtorit të Qendrës së Studentëve (QS), post të cilin sipas institucioneve e mbajti jashtëligjshëm për më shumë se një dekadë.
Sulmi ndaj gruas nuk u paraqit në raportin 24- orësh të Policisë, pas interesimit të KosovaNews konfirmohet rasti
Edhe pse sulmi verbal e fizik që përjetoi një grua (nënë e tre fëmijëve) ditën e diel ishte raportuar në organet e rendit nga viktima, nuk u paraqit në raportin 24- orësh të Policisë së Kosovës.
Ky rast i dhunës nuk figuroi as ditën e hënë e të martën. Por, pas interesimit të KosovaNews, zyrtarët nga Policia e Kosovës e kanë konfirmuar rastin.
“Ai rast është duke u trajtuar nga Policia e Kosovës si sulm ndaj personit zyrtar”, ka thënë për KosovaNews zyrtarja për informim e Policisë në rajonin e Prishtinës, Flora Ahmeti.
Për rastin e sulmit redaksia ka tentuar të merr edhe versionin e Fatmir Sfishtës, por ky i fundit nuk ka qenë i qasshëm dhe deri në kohën e publikimit të artikullit nuk ka kthyer përgjigje në pyetjet tona.
“Më shau e mandej më goditi dhe bërtiste: Ka me të mbyt krejt…”, rrëfen rastin zyrtarja që u sulmua
Zyrtarja për Barazi Gjinore në Qendrën e Studentëve, G.V., ka rrëfyer rastin e sulmit, nga i cili thotë se përjetoi ankth dhe ende ndjehet e shqetësuar.
Viktima G.V, që është nënë e tre fëmijëve, thotë se nuk ka pritur që një gjë e tillë t’i ndodhte nga askush, dhe aq më pak nga me të cilin ka punuar gjatë në një institucion.
“Kjo që ka ndodhur më ka shqetësuar shumë e më ka sjell ankth. Rastin e kam paraqitur në polici dhe kam dhënë deklaratën për gjithë këtë tmerr që kam përjetuar”, thotë G.V.
Ajo rrëfen si e ndalën në rrugë e mandej nisën ngacmimet, fyerjet e sharjet dhe në fund goditja nga Fatmir Sfishta, i cili e ka kanosur edhe me mbytje.
“Kam qenë duke shkuar te vëllai dhe deri sa ecja në rrugë kam parë që afër është ndalur një veturë dhe aty ka qenë ish- drejtori me gruan dhe vajzën e tij. Unë kam vazhduar rrugën dhe prapa kam dëgjuar duke më thirrë një zë gruaje. Unë i thash urdhëro. Ajo nisi të flas për drejtorin dhe të më ngacmoj me fjalë dhe unë i thash që nuk më intereson dhe vazhdova të eci. Atëherë ka ardhë vetë ish- drejtori dhe më ka fyer e sharë në mënyrat që unë nuk mund të shprehem. Mandej edhe më ka goditur dhe më thoshte pa ndalë duke bërtitur, ka me të mbyt krejt”, ka thënë M.V.
KosovaNews mëson se gruaja e Sfishtës që u përfshi në rastin e sulmit ndaj zyrtares së Qendrës së Studentëve, punon në Ministrinë e Punëve të Brendshme.
Kush është sulmuesi, Fatmir Sfishta – Punësimet e familjarëve dhe të afërmeve në Qendrën e Studentëve
Ministria e Arsimit, Shkencës dhe Teknologjisë më 20 shtator e ka shkarkuar nga pozita e drejtorit të Qendrës së Studentëve në Prishtinë, Fatmir Sfishtën.
Ai është shkarkuar nën arsyetimin se janë identifikuar parregullsi dhe shkelje esenciale të dispozitave ligjore sa i përket emërimit dhe kohëzgjatjes së marrëdhënies së punës. Fatmir Sfishta, ishte vendosur në këtë pozitë udhëheqëse më 21 qershor të vitit 2012.
Disa ditë para shkarkimeve që bëri MASHTI, KosovaNews ka raportuar se Sfishta po e mbante pozitën jashtëligjshëm dhe se përveç kësaj po punësonte familjarë e njerëz të afërm në Qendrën e Studentëve.
Vetëm në konkursin e hapur para shkarkimit të drejtorit në Qendrën e Studentëve, pozita udhëheqëse fituan tre persona të afërt me Sfishtën, ku në mesin e tyre është edhe është kunata – motra e gruas së tij, Luljete Latifi.
DETAJE në linkun më poshtë:
