Presidentja Vjosa Osmani ka thënë të premten se Kosova është e përkushtuar që të kontribuojë në mënyrë aktive për një Evropë më të bashkuar, më paqësore dhe më demokratike.
Ajo dha këtë deklaratë pas një takimi që ka zhvilluar me ministrin e Jashtëm të Polonisë, Zbignieë Rau, i cili po viziton Kosovën edhe si kryesues aktual i OSBE-së.
E para e vendit, Vjosa Osmani tha se me ministrin polak është diskutuar për rolin e OSBE-së në mbështetjen e institucioneve të Republikës së Kosovës përgjatë dy dekadave të fundit, si dhe për zhvillimet e fundit të sigurisë në rajon dhe më gjerë.
“Kosova ka shënuar progres të vazhdueshëm në forcimin e sundimit të ligjit, demokracisë dhe të drejtave të njeriut, prandaj presim përkrahje në rrugëtimin tonë euro-atlantik nga shtetet që ndajnë vlera të njëjta”, ka thënë Osmani.
Kryediplomati polak gjatë ditës është takuar edhe me ministren e Jashtme të Kosovës, Donika Gërvalla, ndërsa do të takohet edhe me kryeministrin Albin Kurti dhe kryeparlamentarin Glauk Konjufca.
Pjesë e rendit të tij të ditës janë dhe takimet me udhëheqësit e Misionit të OSBE-së në Kosovë dhe me Grupin e Trajnuesve, grup ekspertësh të të drejtave të njeriut i themeluar nga OSBE.
Ai do të vizitojë po ashtu dhe Komisionin Qendror të Zgjedhjeve (KQZ), që mbështetet nga OSBE.
Polonia është në grupin e shteteve të para që ka njohur pavarësinë e Kosovës, më 26 shkurt 2008, por ende nuk ka hapur ambasadë në Prishtinë.
Ndryshe muajin e kaluar është mbajtur ceremonia e inaugurimit të fluturimit të parë të një linje ajrore Varshavë-Prishtinë-Varshavë, e cila do të jetë në shërbim të përafrimit dhe rritjes së bashkëpunimit mes dy vendeve. Po ashtu Polonia në Kosovë ka prezencë ushtarake në kuadër të NATO-së. Tani Polonia ka në Kosovë 247 ushtarë.
