Një rast i veçantë ka ndodhur këto ditë në rrugën ‘Beteja e Kaçanikut’ në Ferizaj, ku një 36-vjeçar dje ka përfunduar në Polici pas denoncimit nga bashkëshortja e tij.
KosovaNews mëson se ky rast ka ndodhur të mërkurën, ku i dyshuari kishte shkuar në shtëpi me një grua tjetër, të cilën bashkëshortes ia kishte prezantuar si gruan e tij të dytë. Kur bashkëshortja e tij kishte shprehur pakënaqësi lidhur me vendimin e 36-vjeçarit, ai e kishte kërcënuar atë se do ta largojë nga shtëpia.
33-vjeçarja për të zgjidhur këtë problem, kishte denoncuar rastin në Polici, por kjo e revoltoi edhe më shumë bashkëshortin e saj i cili kishte telefonuar familjarët e gruas dhe u ishte drejtuar me fjalët “Hajdeni merreni motrën tuaj se e vras”.
Gjithashtu, dje gjatë ditës, ferizajasi e kishte sulmuar duke e kapur për fyti edhe motrën e tij, e cila kishte shprehur po ashtu pakënaqësi lidhur me vendimin për të marrë një grua të dytë.
Pas denoncimit, njësitet policore kanë arrestuar personin e dyshuar, i cili është shoqëruar në stacion policor për intervistim.
Pas përfundimit të procedurave policore, prokurori ka nxjerrë aktvendim që 36-vjeçarit t’i caktohet masa e ndalimit në kohëzgjatje prej 48 orësh dhe ai do të hetohet nën dyshimet për kryerjen e veprave penale ‘Dhunë në familje’ dhe ‘Sulm’.
