Ministri i Kulturës, Hajrulla Çeku ka pritur në takim ish-aktoren e vetme shqiptare në Teatrin e Preshevës, Egzona Salihu, të cilën e kanë larguar nga puna pa arsye të bazuara.
Çeku në Facebook ka shkruar se do ta mbështesë Salihun kundër padrejtësive.
“I premtova mbështetje të plotë në betejën e saj kundër padrejtësive dhe diskriminimit. Në të njëjtën kohë, biseduam për bashkëpunime përmes projekteve kulturore në Kosovë dhe Luginë, duke mos lejuar që politikat momentale të ndikojnë në kulturën e artistët tanë”, ka shkruar Çeku.
Në arsyetimin e largimit nga puna të Salihut, autoritetet e Teatrit kanë thënë se ajo nuk ka respektuar orarin e punës. Ndërkohë, Salihu ka qenë me kontratë në pozitën e ndriçueses. Largimi i saj pati ngjallur reagime të shumta duke dyshuar se ky vendim është bërë mbi baza etnie. Reagime kishte pasur edhe nga përfaqësuesi shqiptar në Kuvendin e Serbisë, shef i Grupit Parlamentar “Lugina e Bashkuar – SDA Sanxhak”, Shaip Kamberi.
