Në një reagim pas shkrimit të ushtruesit të detyrës së kryetarit të Organizatës së Veteranëve të Luftës së Ushtrisë Çlirimtare të Kosovës (OVL-UÇK), Faton Klinaku, se “më parë do ta vriste kryeministrin Albin Kurti sesa që do t’ia lëshonte rrugën e të ikte nga Kosova”, deputeti i Kuvendit të Kosovës nga radhët e Lëvizjes Vetëvendosje, Salih Zyba tha se kjo gjuhë e Klinakut sot nuk është rast i izoluar.
Zyba ka thënë së gjuhë të tillë kërcënuese ndaj kryeministrit kanë përdorur zyrtarë të lartë të secilës parti opozitare në Kuvend dhe se asnjëra në asnjë rast nuk ishte distancuar zyrtarisht nga kjo gjuhë. As sot.
Ai publikoi disa reagime të politikanëve opozitar e që sipas tij, heshtja e tyre bën që të besohet se ata mbase ndjehen të përfaqësuar me kërcënimin e Faton Klinakut.
Për postimin e së martës, Klinaku është intervistuar nga Policia e Kosovës. Avokati i tij ka thënë se shkrimi në Facebook është “nxjerrë nga konteksti”.
