Grupi “Grmia 55”, bashkë me Komunën e Prishtinës, kanë organizuar aktivitet vrapimi me qëllim të ngritjes së vetëdijes dhe ndërgjegjësimit për parandalimin e sëmundjes së kancerit të gjirit. Kreu i Komunës së Prishtinës, Përparim Rama, tha se ky aktivitet ka për qëllim vetëdijesimin e qytetarëve për parandalimin e kësaj sëmundje.
Ndërgjegjësimi dhe vetëdijesimi ndaj sëmundjes së kancerit ishte qëllimi që vrapimit iu bashkua edhe i pari i kryeqytetit, Përparim Rama.
“Ideja është që kampanja të vazhdojë, kemi një numër të madh që na janë bashkuar prej sportistëve, futbollistë, volejbollistë po ashtu organizata joqeveritare, biçiklistë e motoçiklistë. Ju lutem që të gjithë të blejnë nga një bluzë. Ne kemi ofruar që për çdo person që blenë një, përveç që e ka hyrjen falas në pishinë, po ashtu ne si kryeqytet do ta blejmë edhe një shtesë që të mbledhim sa më shumë të holla për këtë organizatë e cila mbron jetët e njerëzve”, tha Rama.
Drejtori i Shëndetësisë në Komunën e Prishtinës, Izet Sadiku tha se ky aktivitet është organizuar pasi që sëmundja e kancerit të gjirit është sëmundja më e shpeshtë e grave, ku çdo e treta grua preket nga kjo sëmundje.
“Motoja e kësaj është “Vrapo për shëndetin”. Prandaj po i ftojmë të gjithë qytetarët që të vrapojnë për shëndetin duke pasur parasysh që kanceri i gjirit sot është kaceri më i shpeshtë te femrat. Ne Komuna e Prishtinës kemi blerë tre mamografë. Mamografia në Prishtinë është falas që nga muaji tetor i vitit të kaluar. Ne subvencionojmë çdo grua e cila ka kancer të gjirit deri në 250 euro, për gjëra elementare”, tha Sadiku.
Nga ”Grupi Gërmia 555” thanë se aktiviteti i së shtunës kishte për qëllim nismën aktiviteteve që do të mbahen në muajin tetor.
“Qëllimi ka qenë mos me mbështet “Race for thecure”, jo vetëm më 1 tetor por ne kemi dashur me e mbështet me një ditë të zakontë të “Gërmia 555″, një ditë vrapi. Kështu që jemi shumë të kënaqur. Uroj që më 1 tetor të mblidhen edhe më shumë për me e rritë ndërgjegjësimin për parandalimin e sëmundjes së kancerit të gjirit”, tha Ardita Rapuca nga “Grupi Gërmia 555”.
Ky aktivitet vrapimi i paraprin, “Race for the cure Prishtina 2023” garë vrapuese për ngritjen e vetëdijes ndaj sëmundjes së kancerit, e cila do të mbahet më 1 tetor, në Prishtinë.
