Një ilaç i zbuluar nga studiuesit japonezë një ditë mund të na lejojë të rigjenerojmë dhëmbët tanë
Studiuesit në Japoni po zhvillojnë një ilaç që besojnë se do t’u mundësojë njerëzve të rritin dhëmbë të rinj për të zëvendësuar ata që kanë humbur.
Ilaçi për rritjen e dhëmbëve të rinj së shpejti do të hyjë në provat klinike te njerëzit, pasi është treguar efektiv te kafshët.
Nëse provohet i sigurt dhe efektiv te njerëzit, ilaçi i zbuluar nga studiuesit japonezë një ditë mund të na mundësojë rigjenerimin e dhëmbëve të humbur për shkak të lëndimit, prishjes së dhëmbëve ose pleqërisë.
Protezat dhe implantet mund të zëvendësojnë këta dhëmbë të humbur, por kjo nuk jep kurrë një ndjenjë të plotë natyraliteti dhe përfshin procedura serioze kirurgjikale.
Ekipi hulumtues japonez po avancon zhvillimin e ilaçit revolucionar që mund t’u lejojë njerëzve të rritin dhëmbë të rinj dhe provat klinike duhet të fillojnë në korrik 2024. Ilaçi për ringritjen e dhëmbëve është menduar kryesisht për njerëzit që, për shkak të defekteve të lindura, nuk rriten një grup i plotë dhëmbësh. Ekipi synon ta ketë ilaçin gati për përdorim të përgjithshëm në vitin 2030.
Në eksperimentet e mëparshme mbi kafshët, ilaçi stimuloi rritjen e dhëmbëve të “tretë” pas atyre të qumështit, dhe më pas dhëmbëve të përhershëm tek të rriturit.
– Mundësia për të rritur një dhëmb të ri është ëndrra e çdo dentisti. Unë kam punuar për të që kur jam diplomuar. Kisha besim se do të isha në gjendje ta arrija atë – thotë Dr. Katsu Takahashi, studiuesi kryesor dhe drejtuesi i Departamentit të Stomatologjisë dhe Kirurgjisë Orale në Spitalin Kitano të Institutit të Kërkimeve Mjekësore në Osaka.
Anodoncia është një defekt kongjenital që prek rreth një për qind të popullsisë dhe rezultati është se pacienti nuk i ka të 32 dhëmbët. Faktorët gjenetikë mendohet të jenë shkaku kryesor i një të dhjetës së pacientëve me anodonci që nuk kanë gjashtë ose më shumë dhëmbë, një gjendje e kategorizuar si oligodonti. Këto kushte njihen edhe si agjeneza e dhëmbëve. Njerëzit që rriten me agjenezë të dhëmbëve luftojnë me funksionet bazë si përtypja, gëlltitja dhe të folurit që në moshë të re, gjë që ndikon negativisht në zhvillimin e përgjithshëm.
Pas marrjes së diplomës në stomatologji, Dr. Takahashi u regjistrua në studimet pasuniversitare në biologji molekulare në Universitetin e Kiotos në vitin 1991. Pas kësaj, ai u aftësua në Shtetet e Bashkuara. Rreth kësaj kohe, kërkimet në mbarë botën filluan të zbulonin gjenet që, kur fshiheshin, do të shkaktonin që minjtë e inxhinieruar gjenetikisht të kishin më pak dhëmbë.
– Numri i dhëmbëve ndryshonte nëpërmjet mutacionit të vetëm një gjeni. Nëse e fokusojmë kërkimin tonë, duhet të ketë një mënyrë për të ndryshuar numrin e dhëmbëve edhe te njerëzit – pohon Dr Takahashi.
Rreth vitit 2005, kur pas kthimit në Japoni, ai vazhdoi të bënte këtë kërkim në Universitetin e Kiotos. Studiuesit zbuluan se minjtë të cilëve u mungonte një gjen i caktuar kishin një numër të shtuar dhëmbësh. Një proteinë e quajtur USAG-1, e sintetizuar në gjen, u zbulua se kufizonte rritjen e dhëmbëve. Me fjalë të tjera, bllokimi i veprimit të asaj proteine mund të lejojë rritjen e më shumë dhëmbëve. Ekipi hulumtues Takahashi e ngushtoi fokusin e tyre në USAG-1 dhe zhvilloi një ilaç antitrupash neutralizues që mund të bllokojë funksionin e proteinës.
Në eksperimentet e vitit 2018, minjve me një numër kongjenitalisht të ulët dhëmbësh iu dha një ilaç që shkaktonte daljen e dhëmbëve të rinj. Rezultatet e hulumtimit u publikuan në punimin shkencor amerikan në vitin 2021 dhe tërhoqën shumë vëmendje si fillimi i terapisë për rigjenerimin e dhëmbëve në botë. Tani po punojnë për përgatitjen e ilaçit për përdorim njerëzor. Kur të vërtetohet se nuk ka efekte të dëmshme në organizmin e njeriut, do të drejtohet për trajtimin e fëmijëve të moshës 2 deri në 6 vjeç që kanë anodonci. “Shpresojmë të hapim rrugën për përdorimin klinik të ilaçit”, thotë doktor Takahashi, raporton https://mainichi.jp/.
Nëse provat klinike janë të suksesshme, ilaçi për rigjenerimin e dhëmbëve mund të ndryshojë situatën në të gjithë fushën e stomatologjisë.
