Ballkani ka bërë një tjetër paraqitje të mirë në garat evropiane.
Kampioni i Kosovës triumfoi 2:0 në “Fadil Vokrri” ndaj ekipit nga Gjibraltari, Lincoln Red Imps në ndeshjen e parë të rrethit të tretë kualifikues në Ligën e Konferencës.
Pas ndeshjes foli trajneri i suharekasve, Ilir Daja.
Ai u shpreh i kënaqur, teksa tha se kanë bërë një gjysmë hapi para.
“Morëm atë që deshëm. Kemi ndryshime në lojë dhe në ekip, duke zëvendësuar Rrahmanin dhe Emërllahun që s’mund t’i zëvendësojmë për një jave. Disa lojtarë janë me viruse dhe gjendja fizike nuk ishte e duhura. Me rezultat 2-0 kemi bërë gjysmë hap para, e rëndësishme është ta mbyllim me kualifikim pavarësisht ndeshjes së sotme”, tha Ilir Daja pas ndeshjes.
Kjo fitore i jep përparësi të madhe Ballkanit në lojën e kthimit që zhvillohet pas një jave në Gjibraltar.
