Zëvendësministri i Ministrisë së Mjedisit, Planifikimit Hapësinor dhe Infrastrukturës, Hysen Durmishi ka folur sërish për rastin e automjetit “Pick-up”që përdorej në mirëmbajtjen e rrugëve regjionale e nacionale, para ardhjes së Qeverisë Kurti në pushtet.
Durmishi gjatë intervistës dhënë për Telegrafin tha se gjate qeverisjesve të kaluara ishin nënshkruar kontrata të tilla si kjo që lëvizjet për inspektimin e punimeve në projektet rrugore bëheshin me një veturë “Pick-up”, e për të cilën tha se për tri vite janë dhënë 900 mijë euro.
Po ashtu, ai sqaroi se si në kontratë nuk është parashikuar se sa herë duhet të del për inspektim të punimeve ky automjet, për të cilën tha se me kontratat e reja kjo formë e pagesës ka ndryshuar.
“Për autostrada janë dy kontrata, njëra i ka 40 km si edhe tjetra 40 km, me gjithë rrugët lidhëse. Lëvizja zakonisht bëhet me ‘Pick Up’. I hyp ‘Pick-up’ e del e i viziton ato rrugë. Në atë pozicion të kontratës nuk shkruan sa herë duhet me dal… a del njëherë në muaj, a çdo ditë nuk është e specifikuar. Ne si institucion sipas kontratës jemi të obliguar me ia pagu 25 mijë euro në muaj, vetëm për atë pozicion për tri vjet, d.m.th 900 mijë euro. 900 mijë euro i merr kompania vetëm se dikush lëviz 1 herë në muaj, a 10 herë në muaj nga 40 km e në fund i merr 900 mijë euro. Ka përfundu kjo kontratë. Ne tash i kemi ndryshuar rrënjësisht kontratat që kanë qenë më herët”, u shpreh Durmishi, ndërsa tha se ndërprerja e këtij lloj kontratave nga Qeveria Kurti, ka bërë që opozita të jetë në siklet dhe të lëshohet në akuza pa bazë e shpifje.
Për më shumë shihni VIDEON nga minuta 20:25 e tutje…
