Marketi i njohur nga Ferizaj “Plus Market” i cili është bërë i famshëm dhe i pëlqyer nga konsumatori kosovar pasi që nuk mban asnjë lloj të produktit me origjinë nga Serbia tanimë ka hapur edhe pikën e dytë në Bresje të Fushë Kosovës.
Në ceremoninë e hapjes ishin të pranishëm Ministrja e Industrisë, Ndërmarrësisë dhe Tregtisë znj.Rozeta Hajdari, deputetë të Kuvendit të Kosovës si dhe prodhues dhe afaristë vendorë.
Ceromonia e hapjes u mbajt pikërisht në ditën e përvjetorit të pavarësisë së ShBA-së si shenjë falënderimi dhe mirënjohje ndaj Shteteve të Bashkuara të Amerikës për kontributin e dhënë për lirinë e Kosovës. Në këtë ceremoni morën pjesë edhe disa ushtarak nga ushtria Amerikane nga kampi “Bondstill”.
Në fjalën e rastit ministrja Hajdari tha se ndjehet e privilegjuar që merr pjesë në këtë ceremoni ku promovohen produktet vendore.
“Plus Market”, tashmë nuk ka nevojë për shumë fjalë. Ka kohë që nëpërmes veprimtarisë së tij, flet më së miri. Megjithatë, dua të them se ai është shndërruar në një brend për t’u ndjekur edhe nga të tjerët, me punën, përkushtimin dhe modelin që aplikon. Ky market na jep një shembull të fortë se ne mund të jemi konkurrues në treg duke ruajtur identitetin dhe vlerat tona kombëtare” tha Hajdari
Ministrja Hajdari tha se janë të angazhuar maksimalisht si ministri por edhe e gjithë qeveria për përkrahjen prodhuesve dhe afaristëve vendorë ku puna e tyre e palodhur dhe vizioni i tyre kreativ, me patjetër që ka sjellë rezultatet që shohim sot.
“Si ministre e Industrisë, Ndërmarrësisë e Tregtisë, bashkë me gjithë qeverinë e Republikës dhe me stafin tim, angazhohemi që të ndihmojmë dhe inkurajojmë sektorin e industrisë sonë. Ne do të vijojmë të punojmë për të krijuar mjedis edhe më të favorshëm për bizneset, ku ato mund të zhvillohen dhe të krijojnë vende të reja pune e të rrisin mirëqenjën e tyre e shëndetin e buxhetit të vendit” tha ndër të tjera ministrja Hajdari.
Pronari i “Plus Market” Sylejman Neziri i falënderoj të gjithë të pranishmit dhe u bëri thirrje të gjithë qytetarëve por edhe afaristëve që të konsumojnë dhe përdorin sa më shumë produkte vendore sepse kjo është e vetmja mënyrë për zhvillimin e ekonomisë së vendit.
