Dikur Kina, tashmë Lindja e mesme po trazon çdo ditë tregun e futbollistëve, me oferta të çmendura për yjet që luajnë kryesisht në Evropë. Në shënjestrën e skuadrave arabe është edhe portieri legjendar Gianluigi Buffon.
45-vjeçari, që prej dy sezonesh luan me Parma në Serie B të Italisë, ka marrë një ofertë marramendëse nga Lindja e Mesme. Sipas “Corriere Dello Sport”, për ish-kampionin e botës, oferta është vërtet e çmendur, duke parë edhe moshën: 30 milionë euro për sezon.
Buffon ka ende edhe një vit kontratë me Parmën, por përballë kësaj oferte tunduese ai mund të largohet. Al Hilal ka bërë këtë ofertë për portierin legjendar italian, që ka luajtur edhe me Juventus e PSG para se te rikthehej te Parma, ku dhe ka nisur karrierën e tij.
Kështu, portieri italian mund t’u bashkohet yjeve të tjerë të futbollit që luajnë në këtë kampionat, si Cristiano Ronaldo, Benzema apo Kante, por do të ishte kundërshtar i tyre. Gjithses, Buffon nuk ka kthyer një përgjigje, por e sigurtë është se ai nuk ka ndërmend të varë dorezat në gozhdë.
