Ministri i Punëve të Brendshme, Xhelal Sveçla, ka thënë se Kosova është duke arrestuar kriminelët serb, ndërsa sipas tij, Serbia është duke rrëmbyer policët kosovarë.
Sveçla ka theksuar Serbia ka rrëmbyer 3 policë të Kosovës si hakmarrje për arrestimin e shefit të ashtuquajturës “Mbrojtja Civile”, Milun Milenkoviq, i njohur si “Llune”.
“Serbia ka rrëmbyer 3 policë të Kosovës si hakmarrje për arrestimin e kriminelit Llune. Ne arrestojmë kriminelët, ata rrëmbejnë policët. Llune është një autor sistematik i dhunës që do të përballet me drejtësinë. Të dhënat e tij tregojnë krime të kryera me urdhër nga Beogradi”, ka shkruar ai në rrjetin social Twitter.
Po ashtu, ministri Sveçla nëpërmjet postimit në Twitter i është kundërpërgjigjur drejtorit të ashtuquajturës Zyre për Kosovë në Qeverinë e Serbisë, Petar Pekoviq, i cili kishte deklaruar se Llune “nuk ka kryer asnjë krim”, ndërsa, Sveçla i ka renditur veprat kriminale të kryera nga ai.
Serbia abducted 3 police officers of ?? as an act of revenge for the arrest of the criminal Llune. We arrest criminals, they abduct police officers.
— Xhelal Sveçla (@XSvecla) June 15, 2023
Llune is a systematic perpetrator of violence who will face justice. His records show crimes committed w/orders from Belgrade. pic.twitter.com/3Ym6qFJhbT
Gjatë ditës së mërkurë, tre policë kufitarë të Kosovës janë rrëmbyer nga njësia speciale policore e Serbisë brenda territorit të vendit.
Zëdhënësi i Policisë, Baki Kelani, ka deklaruar se pretendimet se ata ishin arrestuar brenda territorit të Serbisë, nuk janë të vërteta.
Policët ishin patrullues kufitarë dhe kryenin detyrën e tyre në një pikë statike në territorin e Kosovës për të parandaluar kalimin e grupeve kriminale dhe kontrabandën, duke përfshirë dyshime për armatim në atë zonë.
Autoritetet në Serbi ende nuk kanë ofruar informacione lidhur me tre zyrtarët e Policisë së Kosovës.
Zëdhënësi i Bashkimi Evropian, Peter Stano, në një përgjigje për Portalin Dukagjini, ka deklaruar se BE është në kontakt me Kosovën, Serbinë dhe KFOR-in, për të kuptuar se çfarë ka ndodhur saktësisht në lidhje me rrëmbimin e tre zyrtarëve policorë të Kosovës nga xhandarmëria serbe.
“Ne jemi – si çështje urgjente – në kontakt me të dyja palët, si dhe me KFOR-in, për të përcaktuar se çfarë dhe si ka ndodhur saktësisht”, ka thënë ai.
Më tej, Stano u ka bërë thirrje Kosovës dhe Serbisë që të përmbahen nga veprimet që mund të ngritin tensione, teksa kanë përsëritur thirrjen për depërshkallëzim të situatës në veri
Presidentja e Kosovës, Vjosa Osmani, ka bërë thirrje që policët të lirohen menjëherë dhe pa asnjë kusht.
Ajo ka theksuar se kidnapimi i tre zyrtarëve policorë brenda territorit të Kosovës është agresion nga ana e Serbisë.
Dhe sipas saj, ky akt dëshmon edhe njëherë se Serbia nuk është e interesuar për paqe e stabilitet në rajon, por për të shkaktuar destabilizim të Kosovës dhe gjithë rajonit.
