Ambasadorja holandeze në Kosovë, Carin Lobbezoo, në 15-vjetorin e vendosjes së raporteve diplomatike të Mbretërisë së Holandës me Kosovën, ka thënë se shoqëria ndërmjet dy shteteve është shumë më e vjetër sesa raporti i tyre diplomatik.
Lobbezoo tha se kjo shoqëri është rritur thelbësisht viteve të fundit, teksa e ka konsideruar shumë të rëndësishme, sidomos në përballjen e agresionit rus mbi Ukrainën.
Ambasadorja ka përmendur edhe shkëmbimin që Kosova dhe Holanda kanë pasur, kosovarët që kanë shkuar atje dhe eskpertët holandez që kanë ardhur në Kosovë “për ta ndihmuar të bëhet ajo që është sot”.
“Para se ta përgatisja fjalimin tim, shikova letrën në të cilën ministri i Punëve të Jashtme në atë kohë, i shkruante parlamentit tonë që Qeveria, pas konsiderimeve të hollësishme, me 4 mars ka vendosur ta njohë Kosovën. Kjo mendoj se ishte fillimi i marrëdhënieve tona zyrtare. Por, shoqëria jonë është shumë më e vjetër se aq dhe viteve të fundit ajo është rritur në mënyrë thelbësore. Tani kemi 15 vite histori së bashku”.
Lobbezoo tha se të ardhmen e sheh si të përbashkët të dy vendeve, në Evropë.
“Ka shumë kosovarë që kanë ardhur në Holandë, të cilët kanë krijuar jetë fantastike atje. Holanda gjithashtu i ka trajnuar shumë kosovarë dhe ka sjellur shumë ekspertë për ta ndihmuar Kosovën të bëhet ajo që është sot. Është e rëndësishme ta shohim të ardhmen së bashku, të jemi së bashku në Evropë. Tani më shumë se kurrë e kuptojmë sa e rëndësishme është që jemi të bashkuar, sidomos në përballjen e agresionit rus ndaj Ukrainës”.
Tutje, ajo tha se i gjithë festimi nuk do të kishte kuptim pa muzikë, teksa shpalosi edhe pjesë të programit ku do të ketë edhe një ekspozitë muzikore e fotosh nga fëmijë kosovarë të rritur në Holandë.
“Gjatë javës do të eksplorojmë tematikat e së ardhmes së bashku, digjitalizimin e së ardhmes, të ardhmen e ‘gjelbër’, edukimin, diplomacinë, gjithëpërfshirjen. Mirëpo, festimi nuk do të kishte kuptim pa muzikë. Kosova dhe Holanda kanë shumë muzikantë të mirë. Bardhi Haliti ka krijuar një ekspozitë, e cila është fantastike, e që bën bashkë tre artistë të rijnë e të mrekullueshëm kosovarë. Ata janë fëmijë të rritur në Holandë me prindër nga Kosova. Përmes një ekspozite fotosh ata do ta shfaqin edhe jetën e tyre në Holandë”.
E presidentja e Kosovës, Vjosa Osmani, tha se e ardhmja është më e fuqishme nga lidhja e dy shteteve, teksa vlerësoi ndihmën që Holanda ka dhënë në shtetndërtim.
“E ardhmja është padyshim më e fuqishme nga lidhja që dy shtetet tona kanë. Sot, festojmë 15 vjet marrëdhënie diplomatike dhe dua që të përçoj një mesazh të përzemërt miqësie nga ana e të gjithë qytetarëve të Kosovës”
“Kosova e çmon shumë mbështetjen e vazhdueshme të Holandës për promovimin, mbrojtjen dhe forcimin e demokracisë. Për gjatë këtyre viteve, lidhja jonë është përforcuar, ndoshta për shkak të vlerave të përbashkëta që ndajmë”.
Osmani, tutje ka përmendur edhe disa nga fushat në të cilat Holanda ka ndihmuar Kosovën, teksa tha se populli e vlerëson shumë votën e këtij shteti për anëtarësimin në Këshillin e Evropës dhe liberalizimin e vizave.
“Holanda nuk ka qenë vetëm një mike e Kosovës, por një aleat i njerëzve tanë. Holanda vazhdon ta promovojë rregullin dhe ligjin, të drejtat e njeriut dhe fuqizimin e shoqërisë civile, jo vetëm në Kosovë por në gjithë botën. Kontributi juaj në diplomaci, duke trajnuar diplomatët tanë, ka qenë shumë i vlefshëm. Edhe vota juaj për anëtarësimin e Kosovës në Këshillin e Evropës dhe liberalizim të vizave vlerësohet shumë nga të gjithë kosovaret”, tha Osmani.
