Rusia lëshoi më shumë se njëzet raketa dhe dy dronë në qytete në të gjithë Ukrainën të premten duke vrarë shumë njerëz.
Sipas mediave të huaja, përcjell Telegrafi, në Uman, një qytet 215 km në jug të Kievit, dy raketa goditën një bllok banesash, duke vrarë të paktën 17 njerëz dhe duke plagosur disa të tjerë, sipas policisë ukrainase.
Tre fëmijë janë nxjerrë të gjallë nga rrënojat.
Ndërkohë, një grua 31-vjeçare dhe vajza e saj 3-vjeçare thuhet se u vranë në sulmet në qytetin lindor të Dnipro.
Sirenat e sulmit ajror ranë rreth kryeqytetit në sulmin e parë kundër qytetit në gati dy muaj, me forcat ajrore të Ukrainës që rrëzuan 21 nga 23 raketa dhe dy drone sulmuese, sipas autoriteteve lokale.
Dhe presidenti ukrainas Volodymyr Zelensky reagoi në Telegram, duke kërkuar një “përgjigje” ndërkombëtare ndaj “terrorit” rus.
“E keqja mund të ndalet me armë – mbrojtësit tanë po e bëjnë këtë. Dhe mund të ndalet me sanksione – sanksionet globale duhet të rriten”, tha ai në një postim në Twitter.
Ekipet e shpëtimit thanë se një fëmijë, i lindur në vitin 2013, ishte në mesin e të vdekurve. Një tjetër nga të vrarët ishte një grua 75-vjeçare në një ndërtesë fqinje, e cila pësoi gjakderdhje të brendshme nga vala e goditjes, thanë shërbimet e urgjencës.
Ushtarët, civilët dhe ekuipazhet e emergjencës punuan gjatë gjithë natës për të shpëtuar më shumë viktima, ndërsa banorët shpëtuan gjithçka që mundën nga rrënojat.
Sulmet vijnë pasi Ukraina dhe Rusia përgatiten për luftime të reja, me Kievin që është duke grumbulluar trupa dhe pajisje, duke përfshirë tanke, përpara një ofensive të planifikuar pranverore.
