Kryeministri i Kosovës, ka reaguar në lidhje me zgjedhjet e fundit komunale në katër komunat e veriut të Kosovës.
Ai e falënderoi, KQZ-në, për organizimin e zgjedhjeve, teksa për numrin e ulët të votuesve, e fajësoi Serbinë.
Ai tha se bojkoti i procesit të zgjedhjeve, ishte imponuar nga fushata kërcënuese e Serbisë dhe strukturave kriminale në veri, të cilat i quajti si vegla të Beogradit.
“Zgjedhjet për kryetar në katër komunat veriore të Kosovës dhe për kuvendet komunale në dy sosh, dje u zhvilluan qetë dhe pa incidente. Falënderoj KQZ-në për organizimin, policinë e Kosovës për sigurinë dhe qytetarët për mbështetjen. Atmosfera ishte ajo e frikësimit dhe shantazhit andaj edhe dalja e qytetarëve në zgjedhje ishte e ulët. Bojkoti ishte i imponuar nga fushata kërcënuese e Beogradit zyrtar dhe e veglave të tij kriminale në terren në veri. I falënderoj qytetarët për kurajon dhe qetësinë”, shkroi Kurti.
Kurti i uroi kryetarët e rinj, teksa premtoi se Qeveria do t’i përkrahë dhe do t’i ndihmojë në punët e tyre.
“Uroj kryetarët dhe asamblistët e zgjedhur dje. Ata duhet të punojnë me përkushtim dhe të shërbejnë pa dallim. Qeveria do t’i përkrahë e ndihmojë. Sistemi institucional dhe shërbimet publike do të mund të funksionojnë më shumë e më mirë. Për mirëqenien e qytetarëve dhe të drejtat e tyre”, u shpreh Kurti.
Në zgjedhjet e së dielës, dy komuna i ka fituar VV-ja kurse dy të tjera PDK-ja.
