Kryeministri i vendit Albin Kurti ka nisur raportimin në seancën e Kuvendit lidhur me dialogun Kosovë – Serbi, ku po jep sqarimet për marrëveshjen bazë të arritur në Bruksel më 27 shkurt, e të cilën Serbia refuzoi të nënshkruante.
Raportimi i kreut të ekzekutivit nisim pak pas orës 13:00, me kërkesë të partive opozitare, për të dhënë më shumë detaje lidhur me dakordimin në Bruksel rreth propozimit evropian për normalizimin e marrëdhënieve Kosovë-Serbi.
Kurti ua ka kujtuar deputetëve se Bashkimi Evropian e ka propozuar vetëm marrëveshjen bazë, kurse plani i zbatimit duhet të negociohet dhe ato nuk kanë filluar ende.
“Më 27 shkurt isha në dy takime me Lajçakun dhe Borellin dhe mandej në atë trilateral ku ishte edhe përfaqësuesi serb. Aty unë ofrova gatishmërinë që të nënshkruajmë atë marrëveshje, dhe kjo është refuzuar nga Vuçiqi”, tha ai.
Ai theksoi se marrëveshja bazë, apo dokumenti i saj siç është thënë nga ndërmjetësit nuk do të diskutohet më.
Kryeministri tha se për faktin se është refuzuar nënshkrimi nga Serbia është tregues i madh, ndërsa poroziti opozitën që mos të krijojnë linja politike me ata që po e kundërshtojnë nënshkrimin.
“Mos krijoni linja politike sikur ata që janë në kundërshtim me marrëveshjen dhe nuk po pranojnë të nënshkruajnë. Kjo marrëveshje përmban hapa me rëndësi në rregullimin e raporteve të të dyja shteteve në raportet ndërkombëtare dhe njohje të shumë elementeve të shtetit tonë. Nuk pranoj asgjë që shkel rendin tonë kushtetues e integritetin e shtetit, po të përpiqen që gabimet e së kaluarës të rregullohen”, ka thënë mes tjerash Kurti.
Ai shtoi se nga pikat e shumta në marrëvbeshje i vetmi problem është me pikën ku thuhet të zbatohen marrëveshjet e kaluara dhe kjo është pika e 10.
“Asgjë e re që nuk duhet pranuar nuk është futur në marrëveshjen e re. Të gjithë ata që thonë se ne kemi pranuar një element të ri në marrëveshjen bazike, janë gabim dhe nuk janë të informuar”, tha ai.
