Projektligji për Kinematografinë po mirëpritet nga kineastët, me ç’rast kërkuan që i njëjti të përshpejtohet për votim në Kuvendin e Kosovës. Por për të njëjtin u shfaqen edhe disa kritika sa i përket nenit për përzgjedhjen e drejtorit të Qendrës së Kinematografisë së Kosovës.
Gjatë së martës, Komisioni për Arsim, Shkencë, Teknologji, Inovacion, Kulturё, Rini dhe Sport ka mbajtur dëgjim publik për këtë Projektligj me këtë komunitet.
E sa i përket nenit për përzgjedhjen e drejtorit të QKK-së, reagoi aktori i njohur kosovar, Sunaj Raça. Ai kërkoi që për këtë pozitë të ketë disa kritere.
Sipas këtij neni, nuk parashihet që drejtori i QKK-së të posedojë diplomë universiteti, por duhet të ketë vetëm përvojë pune profesionale në fushën e kinematografisë ose kulturës dhe përvojë në pozita drejtuese.
“Neni 13 i këtij ligji ku kërkohet përzgjedhja e drejtorit, mendoj që është shqetësuese fakti që nuk kërkohet arsimimi apo diploma. Unë mendoj se duhet të ketë kritere dhe të shpallet konkursi për anëtarët e jurisë, përndryshe me i zgjedhë anëtarët e jurisë drejtori është gabim, sepse vazhdimisht sillen emrat e njëjtë dhe arsyetimi është i kotë kinse ata nuk po pranojnë, pse nuk më ka thirr mua apo edhe shumë kolegë të mi? Anëtarët mendoj që duhet të kenë një mandat prej 4 vjetësh. Nuk mundet një njeri pa shkollë me udhëheq një institucion kaq të rëndësishëm. Duhet të specifikohet shkollimi në kinematografi”, tha Raça.
Me këtë propozim u pajtua deputetja e Partisë Demokratike të Kosovës, Eliza Hoxha. Ajo tha se është për t’u brengosur që vetëm një drejtor të ketë në dorë një institucion.
“Kështu qysh e kanë bërë se krejt drejtori i ka në dorë edhe nëse nuk është i fushës ka mundësi me pas shumë probleme. Të kish qenë që këshilli drejtues të marrë vendim për programin vjetor, atëherë drejtori normalisht mund të jetë i fushës tjetër. A mendoni që duhet me ua lanë komplet QKK-në në dorë vetëm një drejtori? Jo. Kështu qysh është normalisht që duhet të ndryshohen disa kritere. Brenga ime më e madhe është se a duhet me ja lanë fuqinë e krejt Kinematografisë një personi”, tha Hoxha.
Ndërsa ushtruesi i detyrës së Qendrës Kinematografike të Kosovës, Lum Çitaku tha se ky ligj është i nevojave artistike.
“Është i artikuluar në bazë të nevojave dhe risive. Një prej aspekteve kryesore është rritja e mbështetjes për filmat e shkurtë në 50% më shumë se vitin e kaluar. Integrimi i njësisë do t’i menaxhojë të gjitha kinematë publike në kuadër të këtij ligji. Programi i edukimit është një nevojë, filmi është sot një pjesë ku të rinjtë edukohen përmes tij”, tha Çitaku.
E regjisori, Kastriot Avdyli, pati kritika për vonesat e deputetëve në këtë mbledhje. Ai tha se në kohën kur është tentuar të kalojë Projektligji për Kinematografinë, janë rrëzuar Qeveritë.
“Nuk ishte korrekte vonesa gjysmë orëshe, e aq më pak korrekte mungesa e deputetëve. Sa herë që ka ardhë me u aprovu ligji për kinematografinë janë rrëzuar qeveritë, shpresoj që tani do të bëhet ligji. Kinematografia ka bërë shumë gjëra të mëdha me ndihmën e artistëve. Ka ardhë koha që Qendra e Kinematografisë së Kosovës të jetë Agjension i Pavarur në kuadër të Kuvendit”.
“Për hir të trashëgimisë dhe në koherent me vendet fqinjë dhe të tjera, ‘KosovaFilm’ nuk duhet të shuhet, por të jetë institucion i pavarur shtetëror. Është koha që të mos shuhet por ta ketë atë funksionin e ri, arkivimin e filmave. Duke u bazuar në përvojat e institucioneve ose agjencive të ndryshme duhet të ketë bord, jo këshill. Po të kemi bord do të kemi mbikëqyrje më të mirë, kurse si këshill unë këshilloj, ti këshillon e kështu”, tha Avdyli.
