Pak kohë pas fjalimit të deputetit të PDK-së, Hisen Berisha, i cili hodhi akuza të rënda rreth vdekjes së Astrit Deharit, deputeti Avni Dehari doli nga salla.
Deputetja Tinka Kurti e lidhi daljen e tij me fjalimin e deputetit Berisha.
“Avni Dehari e lëshoi sallën. Njeriu që ka duruar gjithçka, pafytyrësinë e deputetit Berisha nuk mundi”, shkroi Kurti.
Megjithatë, në një prononcim për teve1.info, Dehari tha se e lëshoi sallën për shkak se kishte për t’i dorëzuar disa libra për bibliotekën e shtëpisë së Kongresit të Manastirit.
“Jam dalë për shkak se kemi pas me i dorëzu disa libra për bibliotekën e shtëpisë së Kongresit të Manastirit. Ka koincidu në atë kohë dhe më kanë thirr”, ka thënë Dehari.
I pyetur për deklaratat e Hisen Berishës ai tha rasti i vdekjes së të birit të tij po shfrytëzohet teksa shtoi se “korbat në stërvinë” askush nuk mund t’i ndalë.
“Nuk më intereson kush me emër, por të gjithë ata që i shfrytëzojnë këto raste le të vazhdojnë, mos të ndalen, se korbat në stërvinë askush nuk i ndalë. Deri në fund le ta çojnë, mos të ndalen fare. Këta nuk kanë ndërgjegje, nuk kanë dinjitet. Nuk ia vlen as të tërhiqet vërejtja”, tha Dehari për Teve1.info.
Por çka tha deputeti Hisen Berisha në Kuvend për rastin e Astrit Deharit.
Deputeti i PDK-së, Hisen Berisha, e ka kritikuar partinë në pushtet se qëllimshëm nuk po e zbardh rastin e vrasjes apo vetëvrasjes së ish aktivistit të kësaj partie, Astrit Dehari, raporton teve1.info
Gjatë fjalimit të tij në kuvend, Berisha tha se rastet e tilla janë përdor nga VV-ja për përfitime politike derisa shtoi de është interes i partisë në pushtet që këto raste të mos zbardhen.
“Rastin e Astrit Deharit VV e ka përdor dhe po e përdor për qëllime e përfitime politike. As pas ekspertizës së institucioneve zvicerane nuk ka epilog apo vendim gjyqësor, çka vë në dyshim se ka ndërhyrje direkt politike apo interesi i partisë në pushtet është që ky rast të mos zbardhet. Kjo Qeveri ka për qëllim që të kap drejtësinë përmes këtij rasti dhe rasteve tjera prandaj ky rast nuk po zbardhet që nga 1019 kur VV erdhi në pushtet dhe e ka pushtetin absolut”, tha Berisha.
Ai shtoi e si parakusht për zbardhjen e vrasjes së Astrit Deharit është zbardhja e sulmit ndaj Kuvendit të Kosovës dhe vetëvrasja e Arbnor Deharit, aktivistit tjetër dhe vëllait të Astritit.
“Janë dy parakushte me zbardh vrasjen e Astritit. Parakushti i parë për mu zbardhe vrasja apo vetëvrasja është zbardhja e rastit të sulmeve terroriste në Presidencë apo Qeveri, por ato nuk i zbardhi se barra e përgjegjësisë do të binte në subjektin e juaj. Dhe parakushti i dytë është zbardhja e vetëvrasjes së Arbnorit, se çka e ka shty vrasjen e tij, është sekrete publik ku për shkak të ndjeshmërisë së rastit nuk e ka marrë guximin askush të flas publikisht por është sekret publik të përflitet me emra zyrtarë me të cilët ai ka diskutuar në rolin e sinjalizuesit”, tha Berisha.
Ai shtiu se vjedhja e mostrave të Astrit Deharit së fundmi është ndër argumentet se sipas Berishës kjo vrasje nuk po zbardhet qëllimshëm.
