Zëvendësministrja e Punëve të Jashtme, Liza Gashi, ka reaguar për sulmin ndaj një autobusi me mërgimtarë nga Kosova në territorin e Serbisë.
Sipas saj sulmi që ka ndodhur të shtunën mbrëma, nuk është i izoluar. Gashi ka vlerësuar se sulmet e tilla janë rezultat i politikës së Serbisë dhe presidentit të saj Aleksandar Vuçiq.
“Sulmi i fundit me gurë drejt autobusit me mërgimtarë nga Kosova, është rezultat i politikës së regjimit të Vuçiqit dhe qeverisë së Serbisë”, ka shkruar Gashi në Facebook.
Sipas saj mërgimtarët kosovarë që udhëtojnë përmes Serbisë përballen me pengesa të llojllojshme.
“Mërgimtarët tanë, të cilët udhëtojnë në Kosovë me vetura private ose me autobus duke kaluar përmes Serbisë e dinë që në Serbi mund të përballen me pengesa e vështirësi të llojllojshme si: pritje disa-orëshe të qëllimshme në pikat kufitare serbe, dënime të larta në komunikacion, konfiskime të dokumenteve dhe detyrime të ndryshme për pagesë, e shpeshherë edhe ndalime(arrestime) disa-ditëshe individuale pa ndonjë bazë ligjore”, ka shkruar Gashi.
Sipas saj “mosgatishmëria e Serbisë për tu përballuar me të kaluarën e saj gjenocidale, si dhe regjimi autoritar dhe despotik i presidentit Vuçiq, ka kultivuar një ndjenjë të përhapur ultranacionaliste tek një pjesë e popullit serb, e cila është e përgatitur dhe mbështetëse për luftëra të ardhshme”.
“Lidhja e ngushtë e Serbisë me Rusinë e bënë këtë fakt edhe më shqetësues. Veprimet e fundit në veri të Kosovës, ku u raportua për pjesëmarrje edhe të grupeve kriminale ruse (Wagner), bllokimi i pikave kufitare në mes Kosovës dhe Serbisë nga grupe ‘qytetare’, kërcënimet e Serbisë me vendosjen e ushtrisë në gjendje lufte, dhe sulmet e tilla sporadike drejt mërgimtarëve që thjeshtë po kalonin tranzit, janë shenja mjaftueshëm të qarta të një problemi të madh në Ballkanin Perëndimor: Qeveria e Serbisë!”, ka shkruar Gashi.
