Zëvendësministri në Ministrinë për Kthim dhe Komunitete, Radoica Radomiroviq, ka publikuar dokumente që siç ka thënë ai, dëshmojnë akuzat e vjedhjeve të bëra nga Lista Serbe në Kosovë.
Në publikimin më të fundit në Facebook, Radomiroviq ka publikuar një dokument që tregon se kur Zoran Todiq ishte kryetar i komunës së Lepsaviqit, kanë blerë perde në vlerë prej 15 mijë euro.
“Perde në komunën e Leposaviqit për 15 mijë euro, e pabesueshme. Një tjetër në një seri grabitjesh në listën e zezë”, ka thënë zëvendësministri Radomiroviq.
Po ashtu, ai ka bërë të ditur se Qeveria e Kosovës ka investuar në veri të Kosovës për të përmirësuar jetën e të gjitha komuniteteve, por këto fonde akuzohet se janë vjedhur nga liderët e Listës Serbe.
“Më tej do të shihni se Qeveria e Kosovës ka investuar shumë para në veri të Kosovës, për një jetë më të mirë për të gjitha komunitetet. Fatkeqësisht, ato para u përdorën për Slavko Simiqin, Todiq, Ivan Milojeviq, ata blenë prona të shumta në Serbi dhe Mal të Zi,” ka shtuar zëvendësministri.
Radomiroviq gjithashtu ka denoncuar se taksapaguesit e Kosovës janë vjedhur në veri dhe se Qeveria ka dhënë para për ndërtimin e qendrave, rregullimin e rrugëve dhe investime të tjera, por qeveria lokale e Leposaviqit nuk ka realizuar asgjë.
“Ne po vazhdojmë të zbulojmë shumë dokumente mbi abuzimet që kanë ndodhur në këtë pjesë. Ftojmë të gjithë gazetarët e pavarur që të vizitojnë komunën e Leposaviqit për të vërtetuar shkallën e plaçkitjes së qytetarëve të Serbisë dhe Kosovës nga Zoran Todiq, Slavko Simiq, Ivan Milojeviç,” ka deklaruar ai, ndërsa ka publikuar një dokument shtesë.
Zëvendësministri gjithashtu ka publikuar një vendim të nënshkruar në komunën e Leposaviqit për blerjen e traktorëve me vlerë mijëra euro, ndërsa çmimi i tyre ka qenë rreth 900 euro.
Në dokumentin tjetër të publikuar, ai tregon se Serbia ka financuar një shkollë në këtë zonë, ndërkohë që Qeveria e Kosovës kishte ndarë mbi 100 mijë euro për të njëjtën qëllim.
