Dega e Lëvizjes Vetëvendosje në Komunën e Podujevës i ka reaguar kryetarit të LDK-së në këtë komunë Ekrem Hysenit pasi që ky i fundit dje e akuzoi kryetarin e Podujevës Shpejtim Bulliqin për keqpërdorim të buxhetit që sipas tij janë gjetur edhe në raportin e auditorit.
Në reagimin e saj dega e VV-së në Podujevë e ka quajtur Ekrem Hysenin “Doktor manipulanti” pasiqë
në konferencën e tij sipas VV-së ai ishte lëshuar në ofendime, fyerje e shpifje të ulëta ndaj qeverisjes komunale duke mos ofruar fakte e argumente.
Më poshtë reagimi i plotë i VV-së në Podujevë:
Doktor manipulanti paska llomotitur sërish për gjërat që s’ka haber për to. Ose më mirë të themi për të cilat ka dështuar vetë ai. Këtë herë në një konferencë me vetëvetën paska folur për Raportin e Auditorit, një fushë krejtësisht e panjohur për të.
Doktori manipulanti në këtë konferencë ishte lëshuar në ofendime, fyerje e shpifje të ulëta ndaj qeverisjes komunale (të vetmën gjë që di ta bëjë), duke mos ofruar fakte e argumente. Përveç dështimit për të vërtetuar ato që thotë, ai na dëshmoi që nuk e kalon provimin as për spiker (lexues të lajmeve). Për këtë pjesë shprehim vullnetin tonë për t’i ofruar një kurs falas, që kur t’i lexon “lajmet” herave tjera, të paktën të mos qeshin me të.
E vërteta për raportin e Auditorit të Përgjithshëm për Komunën e Podujevës është se asnjë e gjetur nuk ka të bëjë me dëmtim apo keqpërdorim të buxhetit. Krejt gjetjet e Auditorit, të cilat i lexon keq Doktor manipulanti janë të natyrës procedurale dhe probleme të bartura nga vitet e kaluara si rezultat i Kontratës Kolektive që është nënshkruar në vitin 2017, nga qeveria e LDK-së, gjë e cila që nga ajo kohë u ka mbetur barrë komunave.
Por, meqë qenka marrë me Auditorin, atëherë para se të mbajë konferenca me vetëveten Doktor manipulanti le ta shoh njëherë raportin për Komunën e Prishtinës që qeveriset nga partia e tij, për të cilën Auditortja e Përgjitshme, Vlora Spanca, në një konferencë për media tregoi se për herë të parë i kanë ka dhënë dy konkluzione të kundërta për komunat, njëri është për Komunën e Prishtinës. Ia bëjmë me dije Doktor manipulantit (meqë ai nuk e di) se konkluzion i kundërt nënkupton kur pasqyrat financiare në asnjë situatë nuk përputhen me të vërtetën!