Nëntë palestinezë janë vrarë e dhjetëra të tjerë janë plagosur të martën nga të shtënat izraelite kur turmat ishin në pritje të kamionëve me ndihma në qytetin e Gazës.
Zyrtarët palestinezë kanë konfirmuar ndodhinë, derisa autoritetet izraelite s’kanë reaguar ende për rastin, ka raportuar TheGuardian.
“Bombardimi i tubimeve të njerëzve të uritur është bërë një rutinë e përditshme e praktikuar nga okupimi dhe e parë nga komuniteti ndërkombëtar në ekrane”, është shprehur Ashraf Al-Qidra, zëdhënës i Ministrisë së Shëndetësisë së Gazës.
Ai ka theksuar se ndihmat për palestinezët në Gaza janë të pakta e “çmimi i një vakti mund të nënkuptojë vdekje të sigurt”.
“Ndihmoni njerëzit e veriut, mos i lini të bien pre e urisë, bombardimeve dhe sëmundjeve”, ka shtuar Al-Qidra.
Muajin e kaluar, mbi 100 persona u vranë kur forcat izraelite hapën zjarr pranë një autokolone ndihmash në Gaza. Ushtria izraelite ka thënë se shumica vdiqën nga rrëmuja e krijuar.
