Kuvendi i Kosovës e ka formuar sot komisionin Ad-hoc për zhvillimin e procesit të vlerësimit kalimtar në sektorin e drejtësisë.
Kryetari i komisionit u caktua deputeti Kujtim Shala, zëvendëskryetari i parë Adnan Rrustemi, zëvendëskryetar i dytë Erxhan Galushi, ndërsa anëtarët e komisionit do jenë Avni Dehari, Artan Abrashi, Arjeta Rexhepi, Dimal Basha, Blerta Deliu, Rashit Shalaj, Doarsa Kica Xhelili dhe Pal Lekaj.
Mandati i komisionit është gjashtë muaj prej datës së formimit të tij.
E pas votimit ka reaguar edhe ministrja e Drejtësisë, Albulena Haxhiu, duke e cilësuar lajm shumë të mirë pasi sipas saj do të mundësojë zhvillim dhe jetësim të reformës në drejtësi.
Haxhiu ka thënë se pas votimit të këtij Komisioni, shteti i së drejtës në Kosovë do të bëhet.
Haxhiu po ashtu ka thënë se sistemi i drejtësisë ka nevojë për gjyqtarë dhe prokurorë profesional.
“Sistemi i drejtësisë, duhet ta ketë besimin e qytetarëve dhe ka nevojë për gjyqtarë dhe prokurorë profesional e me integritet, llogaridhënës dhe transparent. Ky proces do t’i garantojë këto”.
Ndër të tjera, Haxhiu i ka uruar punë të mbarë Komisionit Ad Hoc për vettingun në drejtësi i cili u votua në seancën e të premtes së 9 dhjetorit në Kuvendin e Republikës së Kosovës.
“Shteti i së drejtës nuk ka alternativë, ai do të bëhet”, ka shkruar Haxhiu
