Presidentja e Komisionit Evropian, Ursula von der Leyen ka thënë se Komisioni Evropian është i gatshëm për të përgatitur opinionin për status kandidati për Kosovën si dhe të heq masat, por se për këtë duhet unanimitet në Këshill.
Von der Leyen e tha këtë duke u përgjigjur në pyetjen rreth kritikave që i ka shprehur presidentja e Kosovës, Vjosa Osmani, për trajtimin jo të barabartë të Kosovës nga ana e BE-së dhe se pse Kosova ka mbetur me masa ndëshkuese dhe pa status kandidati.
“Jemi të gatshëm të nisim procesin por na duhet një ftesë e Këshillit për të dalur me opinion. Po punojmë që ta marrim këtë dhe ne jemi gati. E njëjta vlen edhe për masat. Ne jemi absolutisht gati t’i heqim masat, por edhe këtu na duhet unanimiteti i vendeve anëtare të cilin tash nuk e kemi, por po punojmë shumë që ta marrim sepse gjithsesi është me rëndësi që edhe Kosova të lëvizë përpara“, ka thënë Von der Leyen duke shtuar se “është me rëndësi të sigurohet se paratë nuk do të humben”.
“Pra mbështetje e plotë për Kosovën por po e shihni se ky është proces të cilin duhet ta tejkalojmë duke marrë parasysh edhe unanimitetin“, ka thënë ajo tutje.
Von der Leyen ka shtuar se shtetet që aspirojnë anëtarësimin në Bashkimin Evropian duhet të përgatiten për përgjegjësitë e anëtarësimit, e nga ana tjetër edhe BE-ja duhet të akomodohet për një familje më të madhe.
“Duhet të ngrihemi ndaj realitetit të ri. Realiteti i ri është se nuk është e mjaftueshme që thjesht ta lëmë derën e hapur për anëtarët aspirues, por duhet të jemi aktivë dhe aktivisht duhet t’i afrojmë. Do të vazhdojmë të punojmë në dy prioritete me partnerët tanë të Ballkanin Perëndimor, njëra është pranimi në BE dhe tjetra është integrimi gradual në tregun tonë të përbashkët”, ka thënë ajo në konferencë për media pas Samitit Be – Ballkani Perëndimor.
Ndërsa, presidenti i Këshillit Evropian, Antonio Costa, ka thënë se shtetet e Ballkanit Perëndimor ishin në linjë me Deklaratën e përbashkët e dalë pas samitit. Ai ka potencuar se Ballkani Perëndimor e ka vendin në BE.
“Nuk ka rajon tjetër në botë ku BE-ja ka investuar kaq shumë burime, financiare, njerëzore dhe ekspertizë. BE-ja është tashmë partneri më i madh ekonomik dhe investitor në Ballkanin Perëndimor. Është dhe do mbetet partneri më i qëndrueshëm në të ardhmen. E dimë të gjithë se disa sfida mbeten. Mosmarrëveshje bilaterale dhe dilema fqinjësore ende duhet të adresohen. Duhet të qëndrojmë të fokusuar ne reforma kredibile dhe të qëndrueshme, dhe pranimi do të bëhet në bazë të meritave”, ka thënë Costa.
Costa ka shtuar se duhet shfrytëzuar momentumi i ri “për të krijuar kushtet e nevojshme për zgjerim, sepse nuk ka dyshim që e ardhmja e Ballkanit Perëndimor është në BE”.
