Ministri i Shëndetësisë Arben Vitia, përmes një postimi në facebook ka uruar që të lënduarit nga shpërthimi i bombolës së gazit ta kalojnë sa më parë këtë gjendje.
Vitia ka bërë të ditur se mjekët janë duke bërë gjithçka për të mënjanuar çdo rrezik për jetën.
Tutje ka treguar se ndodhet ende ne Klinikën Emergjente në QKUK, bashkë me mjekët, infermierët dhe stafin tjetër.
Postimi i plotë:
Të lënduarit nga shpërthimi i bombolës së gazit në fshatin Kçiq të Mitrovicës janë trajtuar sot gjatë ditës në spitale e QKUK. Ata, 15 anëtarë të familjes, pësuan djegie e një pati lëndime në gjoks.
Ende jemi në Klinikën Emergjente në QKUK, bashkë me mjekët, infermierët dhe stafin tjetër. Të gjithë ishin e ende janë në mobilizim e angazhim të lartë prej shumë orësh. Po ofrohet kujdesi i plotë e profesional për të lënduarit.
Katër nga të lënduarit pasi që janë operuar nga mjekët në QKUK, meqë kanë shkallë më të lartë të djegieve janë transferuar për mjekim të mëtutjeshëm në Mjekim Intensiv Qendror.
Tetë të lënduar janë transferuar në Klinikën e Kirurgjisë Plastike.
Dy të lënduar janë në Klinikën e Kirurgjisë Abdominale.
Ndërsa një nga të lënduarit është në Klinikën e Kirurgjisë Torakale.
Mjekët janë duke bërë gjithçka për të mënjanuar çdo rrezik për jetën.
Përpjekjet vijojnë dhe në këto çaste.
Uroj me gjithë zemër që të gjithë të lënduarit ta kalojnë këtë gjendje sa më parë!
