Komisioni Qendror i Zgjedhjeve në Kosovë nëntë vjet më parë vendosi që në fletëvotimet për zgjedhjet lokale të nëntorit 2013, të heq stemën e Republikës së Kosovës dhe në vend të saj të jetë logoja e KQZ-së.
Deri në atë kohë, pra në vitin 2013 në fletëvotime ishte e vendosur stema e Republikës së Kosovës.
Autoritetet në Beograd patën kërkuar që në fletëvotimet e 3 nëntorit të mos ketë shenja të shtetësisë së Kosovës, pasi në të kundërtën, nuk do t’iu bëjnë thirrje serbëve të Kosovës që të marrin pjesë në procesin zgjedhor.
Kështu udhëheqja e atëhershme mori vendim dhe hoqi stemën e Republikës së Kosovës.
Vendimi i KQZ-së ishte mirëpritur nga ambasadat e huaja që kanë misionet diplomatike në Prishtinë.
Atifete Jahjaga, e cila atë kohë mbante postin e presidentes së Kosovës, pati inkurajuar KQZ-në që në përputhje me mandatin të gjejë zgjidhje që respekton kushtetutshmërinë dhe ligjshmërinë e Kosovës dhe siguron pjesëmarrje gjithëpërfshirëse në zgjedhjet komunale të 3 nëntorit.
