Instituti Hidrometeorologjik i Kosovës ka njoftuar parashikimin e motit për këtë fundjavë, duke paralajmëruar ditë kryesisht të qeta dhe të favorshme për aktivitetet bujqësore.
Sot pritet të mbajë mot me diell, me vranësira të herëpashershme kryesisht mbi zonat kodrinore dhe malore. Temperaturat minimale do të jenë ndërmjet -2 dhe 0°C, ndërsa ato maksimale do të arrijnë nga 12 deri në 16°C. Era do të fryjë e lehtë deri mesatare nga veriperëndimi.
Kurtse të dielen do të sjellë kushte atmosferike të ngjashme, me temperatura minimale nga -1 deri në 1°C dhe maksimale prej 14 deri në 17°C. Era parashihet të jetë e lehtë nga verilindja me shpejtësi 1–3 m/s.
Kushtet agrometeorologjike gjatë vikendit vlerësohen si shumë të favorshme për punët bujqësore, veçanërisht për mbjelljet vjeshtore. Tokat paraqiten me strukturë të përshtatshme dhe lagështi të moderuar, çka ndihmon sigurimin e mbirjes uniforme.
Instituti rekomandon që fermerët të shfrytëzojnë këtë periudhë stabile për intensifikimin e punimeve, pasi nga java e ardhshme priten reshje shiu me intensitet të ndryshueshëm, të cilat mund të vështirësojnë qasjen në parcela dhe të ndikojnë në procesin e mbjelljes.
