Mbledhja e Qeverisë së Kosovës nisi me një minutë heshtje në nderim të policit të vrarë të dielën në veri Afrim Bunajku, nga sulmi terrorist që kreu një grupi i serbëve të ardhur nga Serbia.
Kryeministri i vendit, Albin Kurti tha se të dielën është cenuar siguria kombëtare dhe integriteti territorial nga grupet e ardhura nga Serbia.
“Ata kanë bërë përpjekte për gjakderdhje në Kosovë. Personat që morën pjesë në këtë sulm është dokumentuar se janë bashkëpunëtorë të afërt të presidentit serb Aleksadër Vuçiq, ku shihen në shumë takime në krah të tij. Me mbi 5 milionë euro vlerë të armatimit është dëshmuar skenari për gjakderdhje në Kosovë…”, tha kryeministri Kurti.
Ai ftoi qytetarët e vendit që sot kudo që shohin policët e Kosovës t’i falënderojnë ata për shërbimin ndaj Kosovës.
“Përballë kësaj u dëshmua profesionalizimi i jashtëzakonshëm i Policisë së Kosovës, dhe institucioneve të sigurisë në përgjithësi. Është dëshmuar kapaciteti i plotë për ta mbrojtur Republikën. Është suksesi më i madh që nga shpallja e pavarësisë, sukses që na bën krenar të gjithëve. Andaj sot ju ftoj të gjithëve këtu, gjithë qytetarët e Kosovës, të falënderojnë policinë në uniformë kudo dhe kurdo që i shohin”, ka thënë Kurti.
Ai po ashtu ka thënë se sulmi ka shfaqur nevojën për bashkëpunim më të madh ndërkombëtarë në mbrojtjen e kontrollin e kufirit me Serbinë.
Qeveria mori vendim edhe për mbështetjen e familjes së policit Bunjaku më një shumë prej 50 mijë euro.
Kryeministri Albin Kurti ka thënë se me këtë vendim do të mundohen sado pak t’i ndihmojnë bashkëshortes së rreshterit Bunjaku, vajzës dhe dy djemve të tij.
“Ne si shtet do të jemi pranë familjes që na dha një hero, një dëshmor”, ka thënë ministri i Financave, Hekuran Murati.
Afrim Bunjaku u vra të dielën pas një sulmi të armatosur nga një grup terrorist në Banjskë të Zveçanit.
