Lëvizja Vetëvendosje ka shkruar se janë bërë 5 muaj që prej sulmit terrorist të organizuar nga Serbia ndaj Policisë së Kosovës më 24 shtator të vitit të kaluar, e ku u vra rreshteri Afrim Bunjaku.
Vetëvendosje përmes një postimi në Facebook ka kujtuar faktin se Prokuroria Speciale edhe pas kaq kohësh s’ka ngritur asnjë aktakuzë për këtë rast.
“Më 24 shkurt u bënë 5 muaj nga sulmi terrorist i organizuar nga Serbia me qëllim aneksimin e veriut. Deri tash janë shpalosur qindra prova dhe zbuluar pothuajse të gjithë pjesëmarrësit në atë sulm. Por, edhe pas gjithë këtyre muajve dhe provave ende nuk ka asnjë aktakuzë nga Prokuroria Speciale e Kosovës për këtë rast”, thuhet në postim.
Prokuroria Speciale udhëhiqet nga kryeprokurori Blerim Isufaj, i cili synonte të bëhet kryeprokuror i shtetit. Isufaj në përmbyllje të vitit 2023 e pranoi edhe publikisht se ishte ai vetë që kishte hequr urdhër-arrestin ndaj kriminelit e terroristit Millan Radoiçiq.
Para disa muajsh, presidentja Vjosa Osmani ka vendosur të mos e dekretojë Isufajn për kryeprokuror, pasi tha se në procesin e përzgjedhjes së tij kishte “shkelje masive”.
