Lëvizja Vetëvendosje në Prishtinë akuzon udhëheqësit e Komunës së Prishtinës se nuk po respektojnë vendimin e seancës së jashtëzakonshme në të cilën u shkarkuan aksionarët e LDK-PDK dhe u emëruan ata nga opozita e bashkuar.
Pavarësisht vlerësimit të ligjshmërisë nga Ministria e Pushtetit Lokal sipas grupit të lëvizjes Vetëvendosje në kryeqytet, vendimi nuk po zbatohet. Madje Vetëvendosja akuzon partitë në koalicion se po e shfrytëzojnë këtë periudhë për emërime partiake brenda ndërmarrjeve publike.
“Tashmë nuk kemi asnjë dyshim se kjo po bëhet me qëllim të caktuar për të përfituar kohë dhe për t’ju pamundësuar aksionarëve të rinj ushtrimin e detyrave dhe kompetencave të tyre si përfaqësues të Kuvendit Komunal. Me këto veprime, përveç se po shkelen ligjet dhe rregulloret në fuqi, po ju shkaktohet dëm i pariparueshëm ndërmarrjeve publike komunale të cilat kanë mbetur pa mbikëqyrje dhe kontroll të nevojshëm. Për këtë dikush duhet dhënë përgjegjësi. Prandaj, kërkojmë nga zyrtarët kompetent të Komunës së Prishtinës, duke filluar nga kryetari Rama, që menjëherë të përmbushin obligimet e tyre ligjore dhe të zbatojnë me përpikëri procedurat administrative. “
Vetëvendosje kërkon publikim të vendimit edhe në webfaqen e komunës.
