Kryeministri në detyrë, Albin Kurti, bashkë me vartësit e tij si dhe kryetarin e komunës së Podujevës, Shpejtim Bulliqi, kanë vendosur gurin themeltar të pishinës gjysmë-olimpike në këtë komunë, që kapë vlerën e afër katër milionë eurove.
“Pishina gjysmë-olimpike ka një vlerë investimi afër katër milionë euro, prej të cilave afër tre milionë e gjysmë euro janë investim nga Ministria e Kulturës, Rinisë dhe Sportit kurse pjesa tjetër investim i Komunës së Podujevës. Sipërfaqja e gjithmbarshme e ndërtimit do të jetë 4556 metra katrorë. Hapësirat përfshijnë përdhesen, katin e parë dhe podrumin. Në kuadër të këtij projekti parashihet ndërtimi i një pishine për not profesional dhe garues, një tjetër për fëmijë dhe hapësira tjera përcjellëse për rekreacion dhe gastronomi”, janë detajet për këtë projekt që ka bërë të ditura qeveria.
Kurti ka thënë se me këtë projekt qytetarët e Podujevës do të kenë mjedis të këndshëm, në të cilin do të mund të kujdesen për shëndetin e tyre përmes sportit të notit. “Por edhe të shoqërohen së bashku në një ambient publik i cili kujdeset për mirëqenien e qytetarëve. Unë e falënderoj shumë kryetarin e Komunës së Podujevës, gjithashtu edhe ministrin tonë të Kulturës për këtë bashkëpunim të shkëlqyeshëm që rezultoi me pishinën e dytë publike gjysmë olimpike në Republikën e Kosovës, në dy skajet e saj, së pari në Deçan dhe tash në Podujevë”, deklaroi Kurti që është shef në detyrë i qeverisë.
