Pas një sëmundje të rëndë, të dielën ka vdekur profesori Shefki Sejdiu në moshën 88-vjeçare.
Lajmin për vdekjen e tij e kanë bërë të ditur familjarët.
Profesor Sejdiu karrierën e tij prej mësimdhënësi e ka filluar në Gjimnazin e Podujevës, pastaj atë të Prishtinës dhe më vonë pas kryerjes së studimeve pasuniversitare dhe atyre të doktoraturës, të cilat i përfundoi me sukses në Universitetin e Zagrebit, ai ishte profesor i rregullt në Universitetin e Prishtinës.
Profesor Sejdiu ishte njohës i shkëlqyeshëm i gjuhëve romane dhe në veçanti i gjuhës frënge dhe latine.
Për qëllim të hulumtimeve shkencore, si dhe pjesëmarrjes në konferenca shkencore, ai ka qëndruar në një numër të madh të universiteteve evropiane si në Francë, Itali, Portugali, Rumani, Bullgari, Kroaci dhe shtete të tjera.
Pas ndërtimit të institucioneve demokratike të vendit në periudhën e pasluftës, gjatë legjislaturës së parë, ai ishte deputet në Kuvendin e Kosovës.
Varrimi i tij bëhet në Prishtinë sot në orën 17:00 në varrezat e qytetit.
