Gjykata Themelore në Prishtinë, Departamenti i Krimeve të Rënda, ka caktuar masën e paraburgimit prej një muaji ndaj Hashim Rexhepit, pronar dhe instruktor në poligonin e shenjëtarisë “Fazani-S”, për shkak të veprës penale “Shkaktim i rrezikut të përgjithshëm”.
Rasti i rëndë ka ndodhur më 29 gusht 2025 rreth orës 19:20, në rrugën “Driton Hoxha” në Prishtinë, ku tashmë e ndjera Lindore Sejdiu, 24 vjeç, ka humbur jetën pas lëndimeve të rënda trupore të shkaktuara nga arma e zjarrit në poligonin ku po ushtronte.
Nga hetimet paraprake, dyshohet se Rexhepi ka vepruar në mënyrë të pakujdesshme dhe në kundërshtim me rregullat e sigurisë, duke lejuar përdorimin e armës pa mbikëqyrje të mjaftueshme. Viktima dyshohet se gjatë manipulimit me armë, ka qëlluar veten aksidentalisht në pjesën e barkut dhe si pasojë ka ndërruar jetë rreth orës 21:05 në QKUK.
Prokuroria e Shtetit, përfaqësuar nga prokurorja Fitore Sadikaj, ka dorëzuar kërkesën për caktimin e paraburgimit më 30 gusht, duke e cilësuar rastin si me rrezik të lartë për pengim të procedurës dhe ndikim në dëshmitarë. Gjykata ka miratuar kërkesën, duke caktuar masën e paraburgimit nga data 30.08.2025 deri më 30.09.2025.
