Në Bangladesh, përkundër emërimit të kreut të qeverisë së përkohshme, kanë vazhduar protestat,por tani para Gjykatës së Lartë në Dhaka.
Protestuesit po kërkojnë dorëheqjet e gjykatësve të cilët janë parë si besnik ndaj tashmë ish-kryeministres, Sheikh Hasina e cila si pasojë e protestave masive, dha dorëheqje dhe u largua nga vendi.
Sipas raporteve, kreu i Gjykatës Supreme të Bangladeshit Obaidul Hassan, ka thënë se do të jap dorëheqje pas ultimatumit të dhënë nga protestuesit. Raportohet gjithashtu se edhe Guvernatori i Bankës Qendrore të Bangladeshit, Abdur Rouf Talukder ka dhënë dorëheqje si pasojë e presionit të protestave.
Ndërkohë që, Sajeeb Wazed Joy, i biri i ish-kryeministres, tani në ekzil në Indi, Sheikh Hasinas, ka thënë se ajo do të kthehet në vend sapo të shpallen zgjedhjet.
Sipas medieve në Bangladesh, më shumë se 500 persona kanë humbur jetën, shumica siç thuhet të vrarë nga policia, si pasojë e demonstratave disa javëshe ndërsa mijëra janë lënduar e plagosur gjatë dhunës më të egër me të cilën është ballafaquar Bangladeshi që nga lufta për pavarësi në vitin 1971.
Qeveria e përkohshme e përkrahur nga ushtria, e prirë nga laureati i çmimit Nobel Muhammad Yunus, ka dhënë betimin të enjten bashkë me 16 këshilltarë, dy nga të cilët janë liderët e studentëve protestues.
