Vala e të nxehtit që gradualisht do të intensifikohet në javën e ardhshme në zonën e vendeve të mesdheut, do të shtrihet në përmasa më normale edhe në Kosovës, duke arritur temperatura deri në 36 gradë.
Kështu thuhet në një njoftim që ka lëshuar Departamenti Meteorologjik që vepron në kuadër të Agjencisë së Shërbimeve të Navigacionit Ajror (ASHNA).
Si rrjedhojë moti do të jetë kryesisht me vranësira të pakta që pritet të shtohen në orët e pasditës, shoqëruar dhe me erëra të lehta deri mesatare kryesisht drejtimesh veri – verilindore.
Sipas ASHNA-s, temperaturat maksimale do të sillen në mes 32°C – 36°C ndërsa ato minimale në mes 17°C – 21°C.
Ndryshim i motit pritet të ndodhë nga e enjtja me 24 gusht dhe ditët në vijim, kur në orët e pasditës dhe mbrëmjes priten shtrëngata me rrebeshe shiu që lokalisht mund të shoqërohen edhe me stuhi breshëri dhe erëra të fuqishme drejtimesh të ndryshme, ndërsa temperaturat maksimale vazhdojnë të sillen edhe më tutje rreth 30°C.
