Kryetari i PDK-së, Memli Krasniqi, e ka cilësuar nder e krenari që shënimin e datës historike të 17 shkurtit, ta fillojë me vizita te familjet e heronjve, sic i cilësoi ai, “ të luftës dhe të paqes, të cilët po mbahen padrejtësisht në Hagë”.
Krasniqi deklaroi se Hashim Thaçi, Kadri Veseli, Jakup Krasniqi dhe Rexhep Selimi, duke qenë pjesë e celulave të para të Ushtrisë Çlirimtare të Kosovës, finalizuan përpjekjet shekullore të popullit të Kosovës për liri, si dhe pas çlirimit vazhduan punën për të jetësuar ëndrrën tonë për shtet të pavarur e sovran, demokratik e të zhvilluar.
“Kontributi i Hashimit, Kadriut, Jakupit dhe Rexhepit nuk u kufizua në një etapë të vetme historike. Misioni i tyre për t’i dalë zot Kosovës ishte dhe mbetet i përhershëm”, deklaroi Krasniqi.
Ai tha se ndonëse çlirimtarët janë larg familjeve të tyre dhe larg të gjithëve, në misionin e tyre për të dëshmuar pastërtinë e luftës së UÇK-së- “me mendje dhe me zemër ata i kemi përherë pranë”.
“Jam i lumtur që një pjesë të rrugëtimit tim politik, pata fatin ta zhvilloj përkrah këtyre personaliteteve”.
Krasniqi tha se mirënjohje e respekt maksimal për punën e palodhur dhe angazhimin e pandalur të Hashim Thaçit, Kadri Veselit, Jakup Krasniqit, Rexhep Selimit dhe të gjithë luftëtarëve të UÇK-së për Kosovën.
“Gëzuar Dita e Pavarësisë!”
