Ndonëse në vitin e dytë të luftës me Rusinë, Ukraina po përgatitet sërish të rinisë eksportin e energjisë elektrike, një produkt ky që arriti në nivele rekord në bursa, në muajt e parë të nisjes së të ashtuquajturit “operacion special”.
Pas më shumë se 6 muajsh ndërprerje, kjo për shkak dhe të dëmtimit të rëndë të infrastrukturës, Ministri i Energjisë në Ukrainë, Herman Halushchenko paralajmëron një rifillim të eksportit të energjisë, duke nënshkruar dhe një urdhër ekzekutiv që autorizon nisjen e këtij procesi.
Përqendrimi i luftimeve kryesisht në pjesën jugore të vendit, ka bërë që Ukraina të rimarrë kontrollin e shumë rajoneve dhe të punojë për riparimin dëmeve në sistemin e transmetimit të energjisë.
Megjithatë Ministri i Energjisë deklaroi se prioritet në çdo rast do të ketë furnizimi i vendit me energji dhe më pas do të mendohet për eksportet.
Rinisja e eksportit të energjisë elektrike pritet të rrisë ndjeshëm të ardhurat e Ukrainës një pjesë e të cilave do të përdoret për të vijuar mbrojtjen ushtarake përballë agresionit rus.
