New York Post raporton se ministri i Mbrojtjes së Ukrainës, Rustem Umerov, u ka bërë me dije zyrtarëve amerikanë se Kievi është “90 për qind” dakord me kuadrin e ri të paqes të propozuar nga presidenti amerikan, Donald Trump, i cili po përpiqet të ndërmjetësojë një zgjidhje të mundshme për t’i dhënë fund konfliktit të zgjatur me Rusinë.
Ky kuadër, i paraqitur këtë javë në Paris nga Sekretari amerikan i Shtetit, Marco Rubio, i dërguari i posaçëm për Ukrainë, Steve Witkoff, dhe gjenerali në pension, Keith Kellog, synon të sjellë një armëpushim të menjëhershëm dhe hapjen e një faze të re negociatash.
Një zyrtar i lartë amerikan deklaroi se “këtë javë që vjen në Londër, duam të marrim një vendim për një armëpushim të plotë dhe gjithëpërfshirës”.
Ai shtoi se qëllimi i menjëhershëm është të zhvillohen bisedime direkte me përfaqësues të Federatës Ruse dhe t’u prezantohet atyre një ofertë përfundimtare “OK, kjo është oferta juaj më e mirë dhe përfundimtare”, në përpjekje për të kuptuar nëse ekziston vullnet real nga të dyja palët për të ecur drejt paqes.
Zyrtari gjithashtu theksoi se presidenti Trump nuk ka ndërmend të këmbëngulë nëse Rusia refuzon të bashkëpunojë. “Nëse Moska nuk merr pjesë ose nuk reagon pozitivisht, atëherë përgjegjësia për vazhdimin e konfliktit bie mbi aleatët evropianë. Ne nuk do të mbajmë barrën e një konflikti që të tjerët nuk duan ta zgjidhin”, tha ai.
Kjo iniciativë e re diplomatike është kulmi i një sërë përpjekjesh që administrata Trump ka ndërmarrë muajt e fundit për të ulur tensionet dhe për të çuar palët drejt një marrëveshjeje.
Kujtojmë se në shkurt 2025 u zhvilluan bisedime të rëndësishme në Riad mes delegacioneve amerikane dhe ruse, ku për herë të parë u hodhën idetë për një marrëveshje që do të përfshinte çështje territoriale, sigurinë energjetike, dhe neutralitetin e Ukrainës në raport me NATO-n.
Këto zhvillime vijnë në një moment delikat për të dyja palët në konflikt. Ukraina, e lodhur nga lufta e zgjatur dhe me burime gjithnjë e më të kufizuara, po shfaq gatishmëri për një kompromis të kujdesshëm, ndërsa Rusia po përballet me presion të shtuar ekonomik dhe diplomatik.
Në këtë kontekst, ndërhyrja amerikane shihet si një përpjekje për të krijuar një zgjidhje pragmatike që mund të shmangë një përshkallëzim të mëtejshëm të konfliktit dhe të rivendosë njëfarë stabiliteti në rajon.
