Kryesuesi i Kuvendit Komunal të Mitrovicës së Veriut, Nexhat Uglanin, ka thënë se protesta e sotme e organizatës së pensionistëve në Mitrovicë të Veriut u organizua nën hijen e Listës Serbe.
Ai ka thënë se kjo protestë është sinjal për intensifikimin e tensioneve në ditët në vijim.
“Informata nga terreni është që sonte ka dalë një organizatë e re ‘Mbrojtja Popullore’ të cilët kanë shpërndarë fletushka që të përgjigjen kundër policisë dhe kundër administratës komunale përmes koktejeve, gurëve dhe gjërave të tjera”, ka thënë ai.
Ai ka thënë se thirrja është bërë gjithashtu edhe përmes rrjeteve sociale.
Sipas tij, përmes protestave po dalin organizata të ndryshme të cilat po funksionojnë në pjesën veriore.
“Përmes kësaj organizate të re janë edhe ‘Mbrojtja Civile’ dhe grupe të tjera që përdoren për destabilizim të situatës. Tash siguria është në nivel më të lartë për shkak të pranisë së Policisë në pjesën veriore. Janë shumë organizata që po funksionojnë në pjesën veriore. Intensifikimi i tensioneve në ditët në vijim do të bëhet në mënyrë individuale. Po shihet njëfarë qetësie, që tregon se janë të përgatitur për të bërë eksese. Përmes fletushkave po bëjnë thirrje që të sulmohen organet e sigurisë”, ka thënë ai.
Ai ka thënë se sheh rrezikshmëri për policët e Kosovës, prandaj sipas tij duhet bërë kujdes.
Uglanin ka deklaruar se për banorët serbë mund të jetë problem përdorimi i euros, dhe tensionet në veri do të thirren në krizë humanitare.
“Serbët do të mundohen që sa më shumë ta zgjasin kohën e përdorimit të dinarit. Këtu ende po funksionon dinari, po ashtu edhe euroja. Por adaptimi me dinarë do të marrë deri në 6 muaj. Është shumë i vështirë transicioni në afat të shkurt”, ka thënë ai ne KTV.
Sipas tij, ka persona të cilët kanë gatishmëri për të punuar në administratë, porse ata kërcënohen nga strukturat paralele.
