Komandanti i Forcës së Sigurisë së Kosovës, gjenerallejtënant Bashkim Jashari, priti sot me ceremoni ushtarake Komandantin e Forcave Tokësore të Turqisë, gjeneral Metin Tokel, gjatë një vizite zyrtare në Prishtinë.
Në fillim të takimit, gjeneral Jashari e uroi gjeneralin Tokel për emërimin e tij në krye të Forcave Tokësore të Turqisë dhe i shprehu mirënjohjen për vizitën në Republikën e Kosovës. Dy komandantët diskutuan mbi bashkëpunimin e shkëlqyeshëm ndërmjet FSK-së dhe Forcave të Armatosura të Turqisë, duke theksuar rolin e rëndësishëm të trajnimeve dhe aktiviteteve të përbashkëta në zhvillimin dhe ngritjen profesionale të FSK-së.
Gjenerali Tokel rikonfirmoi përkushtimin e Turqisë për të vazhduar dhe thelluar partneritetin me FSK-në, duke vlerësuar lartë progresin dhe profesionalizmin e ushtrisë së Kosovës.
Në përmbyllje, dy gjeneralët u pajtuan që bashkëpunimi bilateral në fushën e mbrojtjes të zgjerohet edhe më tej, veçanërisht në organizimin e aktiviteteve të përbashkëta, me synim forcimin e kapaciteteve dhe rritjen e ndërveprueshmërisë ndërmjet dy forcave.
