Presidenti i Shteteve të Bashkuara të Amerikës, Donald Trump, të hënën ka nënshkruar urdhrin për krijimin e fondit sovran brenda vitit të ardhshëm, duke shtuar se fondi mund të blejë rrjetin social TikTok.
Nëse krijohet, fondi sovran do të vendosë SHBA-në në mesin e shumë vendeve, veçanërisht në Azi dhe Lindjen e Mesme, që kanë fonde të ngjashme si një formë e investimeve direkte përmes buxhetit të shtetit, raporton agjencia e lajmeve “Reuters”.
Urdhri ishte i shkurtër dhe nuk kishte shumë detaje, thjesht kërkonte nga Departamenti i Tregtisë dhe Thesarit krijimin e një plani për krijimin e fondit sovran brenda 90 ditësh, duke përfshirë rekomandime për “mekanizmat e financimit, strategjitë e investimeve, struktura e fondit dhe një model qeverisjeje”.
Zakonisht fondet e këtij lloji financohen nga suficitet e buxhetit për të bërë investime, por SHBA-ja tani funksionon me deficit. Po ashtu krijimi i këtij fondi duhet të aprovohet nga Kongresi.
Trumpi ka deklaruar se “ne do të krijojmë shumë pasuri nga fondi, dhe mendoj se është çështje kohe derisa ky vend do të ketë fond sovran”.
Gjatë kandidaturës për president kishte përmendur këtë lloj forme të investimeve qeveritare, duke deklaruar se do të financonte “përpjekjet e mëdha kombëtare” si projektet infrastrukturore, si autostrada dhe aeroporte, prodhimin dhe kërkimet mjekësore. Zyrtarët e administratës nuk kanë treguar se si do të funksionojë apo financohet fondi, por më herët Trumpi ka deklaruar se mund të financohet nga “tarifat dhe gjëra të tjera inteligjente”.
