Sot bëhet tetë vjet që nga nënshkrimi i marrëveshjes për drejtësi në mes Kosovës dhe Serbisë.
Takimi ndërmjet kryeministrit të atëhershëm të Kosovës, Isa Mustafa dhe atij të Serbisë Aleksandër Vuçiq, kishe përfunduar me nënshkrimin e marrëveshjes për drejtësi.
Kjo sipas ndërmjetësueses në atë kohë, Federica Mogherini ishte arritur rreth orës 2 pas mesnate.
“Rezultat i mrekullueshëm në rifillimin e dialogut Beograd – Prishtinë! Faleminderit të dyja palëve”, kishte shkruar ajo në rrjetin social Tëitter.
Pas takimit, Mustafa kishte thënë se marrëveshja mundëson funksionimin e sistemit unik të drejtësisë në Kosovë.
Ai kishte thënë se nuk do të hapen tema të reja, pa u shuar institucionet paralele në veri me theks të veçantë Mbrojtja Civile.
Ndërkaq, Vuçiq kishte thënë se me arritjen e marrëveshjes fiton Serbia dhe serbët e veriut, të cilët nuk do të mund të mbipërfaqësohen pasi që Gjykata e Mitrovicës do të ketë 9 prokurorë shqiptarë e 9 serbë.
Njësitë e Mbrojtjes Civile në veri të Kosovës kanë operuar jashtë kornizës ligjore të Kosovës pavarësisht nga fakti se Marrëveshja e Brukselit parashikonte në mënyrë të nënkuptuar shpërbërjen e të gjitha strukturave paralele të sigurisë serbe në Kosovë.
Vetë perceptimi i ekzistimit të Mbrojtjes Civile ishte i ndryshëm – ndërsa komuniteti serb në Kosovë e shikonte Mbrojtjen Civile si një strukturë me qëllimin e vetëm të sigurimit të ndihmës për civilët në raste emergjente, Qeveria e Kosovës dhe institucionet ndërkombëtare e perceptonin atë si një strukturë ilegale paraushtarake që duhej të shpërndahej.
Një pjesë e marrëveshjes së Brukselit parashikoi gjithashtu integrimin e mbrojtjes civile në institucionet ekuivalente të Kosovës.
Marrëveshja e Integrimit për Mbrojtjen Civile parashikonte heqjen e njësive të Mbrojtjes Civile në veri të Kosovës, integrimin e tyre në institucionet “civile” të Kosovës, por edhe mbylljen e të gjitha objekteve, zyrave dhe depove të përdorura nga ish anëtarët e saj në veri dhe dorëzimin e tyre në institucionet kosovare.
