Pas një zvarritjeje disa vjeçare, projekti për ndërtimin e Spitalit të Përgjithshëm në Ferizaj më në fund ka hyrë në një fazë të re. Vendimi i fundit i Organi Shqyrtues i Prokurimit (OSHP) ka hapur rrugën për nënshkrimin e kontratës për vazhdimin e ndërtimit të Spitalit të Përgjithshëm në Ferizaj, projekt i cili ka mbetur i papërfunduar që nga viti 2018.
Projekti fillestar për ndërtimin e spitalit kishte nisur në maj të vitit 2018 dhe ishte paraparë të përfundonte në vitin 2021. Megjithatë, që në fillim ai u përball me mangësi të theksuara, pasi plani i hartuar “i ngjante më shumë një projekti ideor sesa një projekti zbatues”. Për shkak të këtyre problemeve, në fund të vitit 2021 kontrata u ndërpre.
Në vitin 2023, Ministria e Shëndetësisë kontraktoi një kompani për hartimin e detyrës projektuese për Spitalin e Ferizajt, duke synuar rikonceptimin dhe përgatitjen e një projekti të plotë zbatues. Në dhjetor 2024, në një mbledhje të Qeveria e Kosovës, u miratua propozim-vendimi për nisjen e procedurave për ndërtimin e Spitalit të Ferizajt, projekt me vlerë rreth 28 milionë euro.
Ky vendim i hapi rrugë inicimit të aktivitetit të ri të prokurimit gjatë vitit 2025. Ministria inicioi në prill të vitit 2025 aktivitetin e prokurimit me titull “Ndërtimi i Objektit të Spitalit të Përgjithshëm në Ferizaj – vazhdim projekti”, me vlerë të parashikuar prej 27,973,970.95 euro.
Gjatë fazës së tenderimit, aktiviteti u përball me disa kërkesa për rishqyrtim ndaj dosjes së tenderit. Ofertat u hapën në korrik 2025, ndërsa procesi i vlerësimit përfundoi më 12 nëntor 2025. Si ofertuesi më i lirë dhe i përgjegjshëm u shpall Grupi i Operatorëve Ekonomikë “ADA Consulting Group SH.P.K.; SHM Architecture SH.P.K.; Termo Consing SH.P.K.”, me ofertë në vlerë prej 23,992,180.83 euro.
Kundër vendimit për vlerësimin e ofertave u ankuan katër operatorë të tjerë ekonomikë, duke deponuar ankesat pranë Organi Shqyrtues i Prokurimit (OSHP) në fillim të muajit dhjetor 2025.
Pas rreth katër muajsh shqyrtim, me 2 mars 2026, OSHP ka marrë vendim lidhur me këto ankesa, duke i aprovuar ato pjesërisht si të bazuara, por duke lënë në fuqi vendimin e Ministrisë së Shëndetësisë për shpalljen e fituesit.
Ky vendim i OSHP-së i hap rrugë nënshkrimit të kontratës dhe vijimit të punimeve për përfundimin e Spitalit të Ferizajt, një projekt me rëndësi të madhe për sistemin shëndetësor dhe për qytetarët e rajonit të Ferizajt, i cili prej vitit 2018 ka kaluar nëpër sfida të shumta procedurale dhe teknike.
