Një aksident trafiku zinxhiror që ka ndodhur në autostradën “Ibrahim Rugova”, më saktësisht në Mazgit-Bresje, në të cilin janë përfshirë 14 automjete janë lënduar disa persona.
Drejtori i Emergjencës në QKUK, Naser Syla tha se tetë persona të lënduar nga ky aksident kanë kërkuar ndihmë mjekësorë.
Tutje, ai është shprehur se tashmë shtatë prej tyre janë liruar dhe njëri është duke marrë ende trajtim.
“Janë 8 të lënduar që kanë kërkuar trajtim në Qendrën Emergjente, 7 janë lëshuar në shtëpi, 1 është ende duke i kryer disa ekzaminime te ne. Të gjithë janë jashtë rrezikut për jetë”, ka thënë Syla.
Në lidhje me këtë aksident, Policia e Kosovës ka bërë të ditur se në aksidentin në Fushë-Kosovë janë 14 automjete të përfshira.
Këtë e ka konfirmuar zëdhënësi i Policisë, Daut Hoxha, i cili ka thënë se rruga ku ka ndodhur aksidenti (në autostradën “Ibrahim Rugova”, në Mazgit-Bresje) do të jetë e mbyllur përkohësisht.
“Rreth orës 06:50 në autostradën ‘Ibrahim Rugova’, Mazgit-Bresje mbi urë te ETC-ja, sipas informatave fillestare, është shkaktuar një aksident trafiku zinxhiror, ku janë të përfshira 14 automjete dhe si pasojë e aksidentit raportohet edhe për persona të lënduar. Kjo rrugë është bllokuar përkohësisht, përderisa njësitet policore dhe ekipet emergjente kanë reaguar ne vendin e ngjarjes për t’u marrë me rastin dhe trajtimin e personave të lënduar. Lidhur me detaje tjera do të njoftoheni pas raportimeve që do të marrim nga ekipet ne teren. Apelojmë për kujdes gjatë vozitjes në këtë kohë me ngrica dhe mjegull, për t’i shmangur rastet e tilla”, ka thënë Hoxha.
