Në anën serbe afër Jarinjës – pikëkalimit kufitar mes Kosovës dhe Serbisë dje është mbajtur një protestë e thirrur nga grupe djathtiste serbe, si shenjë mbështetjeje ndaj barrikadave që kanë ngritur serbët lokalë në veri të Kosovës.
Ndërkohë serbët në veri po vazhdojnë t’i mbajnë barrikadat dhe mos të dëgjojnë thirrjet e Qeverisë dhe bashkësisë ndërkombëtare për t’i hequr ato.
E për gjithë këto zhvillimeve dhe situatën në veri, sot ka shkruar edhe kryetari i LDK-së, Lumir Abdixhiku, i cili e ka quajtur si normalizim i jonormales.
Abdixhiku madje e ka fajësuar në një formë kryeministrin Kurti për tensionet në veri dhe jo shtetin serb.
“Albin Kurti tashmë ka rënë në kurthin e Serbisë. Ai s’mund as të krijojë stabilitet e as të ushtrojë sovranitet në veri. Ai sot nuk ka as edhe një plan shtetëror për të ballafaquar gjendjen në veri. Barrikadat e grupeve kriminale po bëhen tashmë të zakonshme, siç po bëhet i zakonshëm dhe moszëvendësimi i qindra policëve të dorëhequr, prokurorëve, gjyqtarëve e punëtorëve administrativ në veri që s’ushtrojnë detyrat pa të cilat shteti nuk ka përfaqësim”, ka shkruar Abdixhiku.
Për më tepër, sipas kreut të LDK-së, sot Kosova as nuk ka institucione shtetërore në veri e as që mund të organizojë zgjedhje demokratike për t’i zgjedhur këto institucione aty.
“Pra jemi në vakum administrativ. Nëse ishte keq e rëndë në Veri, sot është dhe më keq e edhe më rëndë se që ishte paraprakisht. Kjo është e vërteta në veri dhe këtë të vërtetë institucionet e Kosovës s’mund ta lejojnë të normalizohet tani. Fjalimet e kota e populliste nga foltoret në Prishtinë sot humbasin përbrenda thatësisë. Sot humbasin dhe zërat që i kërkonin Kosovës t’i shpërfaqë sovranitetin aleatëve tanë, tek po të njëjtit aleatë që thirremi sot për ndihmë kur bandat kriminale të Serbisë e Rusisë veprojnë në territorin tonë lirshëm e pa pengim”, ka shtuar tutje Abdixhiku.
Prandaj, sipas tij, koordinimi është mençuri e maturi.
Abdixhiku konsideron se ecja me aleatë ka qenë gjithnjë interes kombëtar i Kosovës.
“Ai shpërfaqet si servilitet vetëm përpara politikanëve të turmave e ideologëve anti-perëndim që për qëllim të hapur mbajnë rrënimin zhbërjen e Republikës së Kosovës. Qeveria e Kosovës duhet të kërkojë ndihmë. Nga aty të koordinojë çdo hap të ardhshëm me aleatë për të kthyer rendin e ligjin në veri. Sjellja e vonuar, apo e pakoordinuar, është vazhdimësi e rënies në kurthin e Serbisë”, ka thënë Abdixhiku.
