Ushtruesi i detyrës së Kryeministrit të Kosovës, Albin Kurti, u takua të hënën me ambasadorët e vendeve të QUINT-it.
Ambasadori britanik në Kosovë, Jonathan Hargreaves, theksoi nevojën për formimin sa më të shpejtë të Qeverisë së re, në mënyrë që të avancohet në çështjet jetike për vendin.
“Pasdite u takova me ushtruesin e detyrës së Kryeministrit Kurti dhe me ambasadorët e tjerë të Quint-it. Inkurajova formimin sa më të shpejtë të Qeverisë së re që të veprojë në interes të Kosovës dhe qytetarëve të saj, duke bërë përparim në çështje të rëndësishme, siç janë zhbllokimi i fondeve dhe avancimi drejt integrimeve euroatlantike”, deklaroi njëri nga ambasadorët pas takimit.
Takimi u zhvillua në një kohë kur Kosova ndodhet në proces paszgjedhor, dhe partnerët ndërkombëtarë po u bëjnë thirrje institucioneve të reja që të formohen dhe të funksionalizohen sa më parë.
Presidentja e Kosovës, Vjosa Osmani, do të fillojë konsultimet me partitë politike në përpjekje për të konstituuar Kuvendin e Kosovës.
Këtë e konfirmoi këshilltari për media i presidencës, Bekim Kupina.
“Presidentja Osmani do të fillojë një seri konsultimesh rreth çështjes së konstituimit të Kuvendit nga data 15 maj. Ftesat tashmë janë dërguar për takimet e para dhe po presim konfirmimet”, tha Kupina.
Më 11 maj, për të katërmbëdhjetën herë më radhë, deputetët dështuan të konstituojnë Kuvendin e Kosovës.
