Policia e Kosovës ka sekuestruar një armë me gaz, një karikator të zbrazët dhe tri gëzhoja në Skenderaj të dielën, pasi në një aheng familjar u dëgjuan të shtëna.
Siç njoftoi Policia të hënën, në cilësinë e të dyshuarit është intervistuar 28-vjeçari me inicialet G.G.
“Me të pranuar informacionin janë ndërmarrë veprime të shpejta policore, ku pas një kohe të shkurtër në një nga fshatrat në Skenderaj është identifikuar vendi nga ku ishin dëgjuar të shtënat në një aheng”, thuhet në njoftimin policor, duke specifikuar se në vendngjarje janë gjetur tri gëzhoja.
Bëhet e ditur se i dyshuari, pas intervistimit është liruar me procedurë të rregullt, kurse ndaj tij u iniciuan veprat penale “përdorim i armës” dhe “mbajtje në pronësi, kontroll apo në posedim të paautorizuar të armëve”.
