Në Kuvendin e Kosovës po vazhdon debati jashtë rendit të ditës dhe në këtë pikë mori fjalën zëvendëskryeministri i Kosovës, Besnik Bislimi, i cili duke u përgjigjur në pyetjet e deputetëve, ka folur rreth mjeteve që gjoja Qeveria e Kosovës po i mban mjetet në thesar.
“Situata më 14 tetor 2022 është kjo. Të hyrat buxhetore deri më sot ka qenë 1 miliard e 940 milionë euro. Ndërkohë të njëjtin ditë të vitit të kaluar, të hyrat buxhetore kanë qenë 1 miliard e 739 milionë euro. Rritja në terma absolut është 201 milionë euro apo 12.1 %. Në të njëjtën kohë shpenzimet buxhetore deri më sot janë 1 miliard 716 milionë euro, përderisa në vitin e kaluar, kanë qenë 1 miliard 593 milionë euro”, tha ai.
Sipas Bislimit, aktualisht në thesar ka më pak mjete se sa ishin në periudhën e njëjtë në vitin 2021.
Bislimi ka kërkuar nga opozita në seancën e Kuvendit të së premtes që t’i ndalë dezinfomatat lidhur me këtë, duke shtuar se janë rritur edhe të hyrat për 12 për qind.
“Dua të deklarohem për atë që gjoja që qeveria po i mban paratë në thesar dhe nuk po i shpenzon. Në ditën e sotme të vitit të kaluar në thesar kemi pasur 702 milionë euro, sot kemi 607 milionë euro kemi mjete më pak se vitin e kaluar. Në ndërkohë qe të hyrat janë rritur 12 për qind është mirë ta ndaloni këtë dezinformatë se nuk i shërben askujt”, ka thënë Bislimi.
