Në rastin gjyqësor ku ish-ministri i Infrastrukturës, Pal Lekaj, akuzohet dëmtim të buxhetit të shtetit për autostradën “Arbën Xhaferi”, të martën ka përfunduar dhënien e deklaratës një nga të akuzuarit, ish-sekretari në këtë ministri, Nebih Shatri.
Në rastin e njohur si “53-milionëshi”, të akuzuar për keqpërdorim të detyrës zyrtare janë ish-ministri i Infrastrukturës, Pal Lekaj, Eset Berisha, këshilltar i lartë politik, Nebih Shatri, ish-sekretar i përgjithshëm në Ministrinë e Infrastrukturës, si dhe Besim Tahiri, drejtor i Prokurimit Publik në këtë ministri.
Prokuroria e akuzon Lekajn dhe tre zyrtarë të tjerë se e kanë dëmtuar buxhetin për 38 milionë euro. Lekaj akuzohet se komitetit ndërministror nuk ia ka prezantuar opinionin e kompanisë mbikëqyrëse “Hill International”, sipas të cilit dëmshpërblimi për “Bechtel&Enkan” duhej të ishte 14 milionë euro, e jo 53 milionë euro sa janë paguar nga buxheti.
Shatri ka thënë se komisioni ndërministror ishte mekanizmi më i lartë vendimmarrës për projektin e autostradës. Ai ka thënë se nënshkrimi i marrëveshjes prej tij, ka qenë çështje protokollare dhe se kompetencat e tij s’kanë qenë të larta.
Në sesionin e pasdites në Gjykatën Themelore në Prishtinë ka vazhduar dhënien e deklaratës, i akuzuari tjetër, Eset Berisha.
