Kryeministri i Kosovës, Albin Kurti në mbledhjen e 55-të të Këshillit të Përgjithshëm të Lëvizjes Vetëvendosje ka numëruar një mori arsyesh për të cilat sipas tij nuk duhet të lëshohet Kosova.
Ai ka thënë se tashmë vendi ka rritje ekonomike e stabilitet institucional me qeverisje të duhur e me sundim të ligjit duke thënë se këto nuk janë vetëm arsye për të mos lënë Kosovën por edhe për ata që janë jashtë vendit të kthehen në atdhe.
“Tash kemi rritje ekonomike dhe stabilitet institucional, progres shoqëror me qeverisje të mirë, sundim të ligjit e shtrirje të sovranitetit, lëvizje të lirë e pa viza për shumë vende. Këto janë arsye jo vetëm për të qëndruar në Kosovë, por edhe për tu kthyer në atdhe”, ka deklaruar Kurti.
Sipas Kurtit, vrima nga e cila rridhte buxheti i qeverisjes, tani po mbyllet përgjithmonë.
“Në këtë gjashtëmujor të parë filloi edhe regjistrimi i energjisë elektrike në katër komunat në veri të Kosovës, dhe inkasimi për konsum të energjisë. Në fushën e energjisë patëm hapa të rëndësishëm, sa janë edhe historike. Më në fund, e pas një kohe shumë të gjatë, me dekada e jo me vite e muaj, vrima prej të cilës rridhte pa ndërprerë e pa masë paraja e buxhetit tonë, po mbyllet njëherë e përgjithmonë”, ka potencuar Kurti.
Në fjalimin e tij, shefi i ekzekutivit ka falënderuar edhe popullin për siç thotë ai mbështetjen e dhënë.
Kurti ka theksuar se populli ia del edhe pa politikën e qeveritë, por sipas tij, politika e politikanët s’kanë kuptim pa popullin.
“Populli ia del edhe pa politikën e qeveritë, por politika e politikanët, qeverisja e kuvendi, nuk kanë as kuptim pa popullin, në shërbim të së cilit është Lëvizja jonë e dashur, Vetëvendosje”, ka vijuar Kurti.
